Një gjykatës federal vendosi të martën se Google nuk do të detyrohet të shesë browser-in (shfletuesin) e tij Chrome apo sistemin operativ Android. Ky vendim përbën një fitore të rëndësishme për kompaninë teknologjike, e cila shmangu pasojën më ekstreme të një rasti historik antimonopol që përcaktoi se ajo kishte krijuar një monopol të paligjshëm në kërkimin online, shkruan CNN, përcjell Katror.info.
Megjithatë, edhe pse Google nuk do të detyrohet të shesë Chrome apo Android, asaj do t’i ndalohet të hyjë apo të mbajë kontrata ekskluzive që lidhen me shpërndarjen e shërbimeve si Chrome, Search, Google Assistant dhe aplikacioni Gemini.
Këto marrëveshje kanë qenë një burim i madh të ardhurash për Google dhe kanë garantuar qasje të gjerë te shërbimet e saj, edhe pse kompania kishte propozuar të hiqte dorë nga to si një zgjidhje e mundshme për çështjen. Gjykatësi Amit Mehta pranoi pjesërisht propozimet e Google në vendimin e së martës.
Mundesh me e lexu edhe...
Procesi gjyqësor vuri nën llupë thelbin e biznesit të Google, në një kohë kur ai tashmë ndodhet nën kërcënimin e rrëzimit nga chatbot-ët e inteligjencës artificiale. Po ashtu, vendimi erdhi ndërsa kompania po përgatitet të mbrojë edhe biznesin e saj të reklamimit online, pasi edhe ky u shpall një monopol i paligjshëm më herët gjatë këtij viti.
“Google nuk do të detyrohet të shesë Chrome; as gjykata nuk do të përfshijë në vendimin përfundimtar një detyrim të kushtëzuar për shitjen e sistemit operativ Android,” thuhet në aktvendim.
Google nuk ka dhënë ende një koment për vendimin.
Ky vendim është ndjekur me vëmendje në të gjithë Silicon Valley, pasi edhe gjigantë të tjerë të teknologjisë po përballen me procese antimonopol të ngritura nga qeveria amerikane.
Në vjeshtën e kaluar, Mehta kishte vendosur se Google kishte shkelur ligjin antimonopol të SHBA-së përmes biznesit të saj të kërkimit, duke shkruar se kompania “është një monopolist dhe ka vepruar si e tillë për të ruajtur monopolin e vet.”
Gjatë fazës disa-javore të gjyqit për “masat ndreqëse”, Google argumentoi se zgjidhjet e propozuara nga Departamenti i Drejtësisë do të dëmtonin konsumatorët, pasi do ta bënin më të vështirë qasjen në motorin e tyre të preferuar të kërkimit dhe mund të ngadalësonin ekonominë amerikane dhe lidershipin teknologjik të vendit. Drejtuesja e Chrome, Parisa Tabriz, dëshmoi se detyrimi për të shitur Chrome do të sillte një “hije të shfletuesit aktual” dhe ka gjasa ta bënte atë “të pasigurt dhe të vjetëruar.”/Katror.info
Përgatiti:
