Google njoftoi të martën një marrëveshje për të blerë kompaninë e sigurisë kibernetike Wiz për 32 miliardë dollarë. Kjo do të ishte blerja më e madhe e gjigantit të teknologjisë deri më sot.
Marrëveshja e blerjes me para në dorë të Wiz, e cila është një kompani private, përfaqëson një bast të madh nga Google në sigurinë e cloud-it dhe sigurinë kibernetike në këtë periudhë rritjeje shpërthyese të inteligjencës artificiale.
Marrëveshja me Wiz, e cila ende duhet të miratohet nga autoritetet rregullatore, tejkalon lehtësisht blerjen më të madhe të mëparshme të Google: një marrëveshje fatkeqe në vitin 2012 për të blerë Motorola Mobility për 12.5 miliardë dollarë. Më vonë, Google e shiti Motorola-n me humbje të madhe.
Mundesh me e lexu edhe…
Wiz, e cila zhvillon softuer për sigurinë kibernetike në cloud, ishte në bisedime verën e kaluar për t’u shitur te Google për rreth 23 miliardë dollarë, sipas burimeve që më parë i thanë CNN-it. Por të dyja palët nuk arritën një marrëveshje dhe Wiz vendosi të fokusohej në një ofertë fillestare publike (IPO).
Kompania me bazë në New York ka përjetuar një rritje të jashtëzakonshme që nga krijimi i saj vetëm pesë vjet më parë. Ajo u themelua nga Assaf Rappaport, Ami Luttwak, Yinon Costica dhe Roy Reznik, të cilët u njohën vite më parë kur u rekrutuan në Njësinë 8200, divizionin e inteligjencës kibernetike të Forcave të Mbrojtjes të Izraelit.
“Wiz ka arritur kaq shumë në një periudhë relativisht të shkurtër, por siguria kibernetike lëviz me shpejtësi të madhe dhe ashtu duhet të bëjmë edhe ne. Koha është tani,” tha Rappaport në një postim në blogun e Wiz. Me 32 miliardë dollarë, blerja e Wiz renditet si blerja e shtatë më e madhe e një kompanie private amerikane në histori, sipas Dealogic.
Disa investitorë në Wall Street shpresojnë që marrëveshja Google-Wiz të shënojë fillimin e një rikuperimi në tregun e blerjeve dhe bashkimeve, i cili ka qenë i ngadaltë muajt e fundit për shkak të paqëndrueshmërisë financiare dhe uljes së besimit të CEO-ve.
Rifillimi i bisedimeve dhe arritja e marrëveshjes vjen pas largimit të rregullatorëve të administratës Biden për antitrustin, të cilët kishin një qasje shumë të ashpër ndaj bashkimeve të mëdha. Lina Khan, ish-kryetarja e Komisionit Federal të Tregtisë (FTC), u përpoq të bllokonte një sërë marrëveshjesh për arsye antitrust.
“Me largimin e Lina Khan nga FTC… motorët e blerjeve dhe bashkimeve janë ndezur sërish në Big Tech,” shkroi Dan Ives, kreu global i kërkimeve teknologjike në Wedbush Securities, në një shënim për klientët të martën.
Natyrisht, disa republikanë e kanë mbështetur qasjen e ashpër të Khan ndaj monopoleve — përfshirë Zëvendëspresidentin JD Vance.
Vitin e kaluar, Vance e vlerësoi Khan si “një nga të paktët njerëz në administratën Biden që mendoj se po bën një punë mjaft të mirë.”/Katror.info
Përgatiti:
