Google ka lansuar mjetin më të fundit për krijimin e videove me inteligjencë artificiale (AI), të quajtur Veo 3, që ka befasuar përdoruesit në mbarë botën me realizmin e pamjeve që krijon.
Video të gjeneruara nga ky sistem po shpërndahen me shpejtësi në rrjetet sociale, duke ngritur debate të mëdha mbi kufirin midis realitetit dhe krijimeve artificiale, raporton Katror.info.
Pse ka rëndësi?
Veo 3 po konsiderohet si përparimi më i madh deri më tani në fushën e videove të krijuara nga AI, duke i bërë shumë përdorues të mos jenë në gjendje të dallojnë nëse kanë të bëjnë me një video të xhiruar nga një ekip filmik apo një algoritëm.
Mundesh me e lexu edhe…
Me aftësi për të përfshirë dialogë të saktë, efekte zanore, tinguj ambienti dhe pamje vizuale hiper-reale, Veo 3 përfaqëson një hap të madh drejt revolucionit në industrinë audiovizuale.
Si funksionon Veo 3?
Ky mjet i ri u prezantua gjatë konferencës vjetore Google I/O, dhe aktualisht është në dispozicion për përdoruesit në Shtetet e Bashkuara përmes paketës së avancuar Google AI Ultra, e cila kushton 249 dollarë në muaj.
Ndryshe nga mjetet e tjera si Sora nga OpenAI, Veo 3 jo vetëm që i përmbahet rregullave të fizikës reale, por ofron gjithashtu lëvizje të natyrshme të trupit dhe sinkronizim të saktë të buzëve me fjalët.
Personazhet që krijon kanë karakteristika të detajuara njerëzore – madje edhe me pesë gishta për dorë – dhe rrallëherë shfaqin ndërprerje ose mospërputhje në video.
Përvoja e krijuesve
Në një video promovuese për “Flow”, platformën kreative të Google ku përfshihet edhe Veo 3, disa kineastë ndajnë përvojën e tyre me këtë teknologji.
Created with Google Flow.
Visuals, Sound Design, and Voice were prompted using Veo 3 text-to-video.
Welcome to a new era of filmmaking. pic.twitter.com/E3NSA1WsXe— Dave Clark (@Diesol) May 21, 2025
Regjisori Dave Clark tha se: “Ndjesia është sikur AI po ndërton diçka vetvetiu, mbi bazën e asaj që ka mësuar më parë.”
Kjo gjeneratë e re e AI-së ofron më shumë liri kreative, por edhe një ndjenjë shqetësuese autonomie që vjen nga mungesa e kontrollit të plotë nga njeriu.
Video e plotë e gjeneruar me Veo 3⬇️
Before you ask: yes, everything is AI here. The video and sound both coming from a single text prompt using #Veo3 by @GoogleDeepMind .Whoever is cooking the model, let him cook! Congrats @Totemko and the team for the Google I/O live stream and the new Veo site! pic.twitter.com/sxZuvFU49s— László Gaál (@laszlogaal_) May 21, 2025
Reagime të përziera
Ndërkohë që disa krijues filmash e shohin këtë teknologji si një mjet të fuqishëm për të realizuar ide që më parë ishin të paarritshme, të tjerë e shohin si kërcënim për artin, autenticitetin dhe të drejtat autoriale.
Kritikët thonë se videot e krijuara nga AI janë “mbetje dixhitale” që s’mund të zëvendësojnë kreativitetin njerëzor. Megjithatë, analisti i AI-së Ethan Mollick ka theksuar se këto mjete mund të jenë shumë të dobishme për fushata marketingu, reklama dhe përmbajtje të shpejtë për media digjitale.
Çështje etike dhe të drejtash
Preokupimet e mëdha qëndrojnë te trajtimi i të drejtave të autorit dhe çështja e pëlqimit. Askush ende nuk e di saktësisht se me cilat materiale është trajnuar Veo 3. Shembuj të mëparshëm kanë treguar që AI mund të kopjojë stile, objekte dhe përmbajtje specifike nga krijuesit pa lejen e tyre.
Një rast i tillë ndodhi me YouTuber-in Marques Brownlee, i cili zbuloi se një video e krijuar nga AI përfshinte një bimë identike me atë që ai përdor në videon e tij.
Çka po ndodh tani?
Një video virale e postuar nga shkencëtari dhe regjisor Hashem Al-Ghaili tregon aktorë të gjeneruar nga AI që flasin drejtpërdrejt kundër krijuesve të tyre – një skenar fiktiv, por që nxit reflektim mbi raportin midis krijuesit dhe krijesës.
Teksa këto teknologji zhvillohen me shpejtësi, industria e filmit, ligjvënësit dhe publiku përballen me pyetje të rëndësishme për të ardhmen e medias vizuale: Kush është autori i një videoje të krijuar nga një makinë? Kush ka të drejtë për shpërndarje dhe përfitime financiare? Dhe si do të mund të verifikohet autenticiteti në epokën e realitetit sintetik?/Katror.info
