Më 17 prill 2024, duke filluar nga ora 18:00 do të bëhet hapja e ekspozitës “GRATË UDHËHEQËSE NË FOKUS“, me fotografi të Arben Llapashticës dhe kuruar nga Eliza Hoxha. Ekspozita do të jetë e hapur në Qendrën Barabar në Prishtinë (Hoteli Grand, Kati 4).
Gratë në historinë e artit në shumësi i kemi parë të jenë muzat e një burri, qoftë ai piktor apo fotograf, skulptor apo regjisor. Ishte nuri i tyre ai që merrte vëmendjen, duke lënë shpesh në sfond virtytet dhe potencialin e tyre. Dhe, jo vetëm gratë artiste, por në përgjithësi gratë që e ndryshuan historinë e botës, që i thyen barrierat për veten dhe për të tjerat, jo gjithëherë iu dha drita, hapësira dhe vëmëndja e merituar. Ashtu si arti që pretendon përherë të zgjojë energji të reja, të ngre pikëpyetje e të na dërgojë në horizonte të reja komunikimi jashtë kutisë dhe të na frymëzojë, ashtu edhe lidershipi është një art në vete, i cili përmes vizionit për të ardhmen, duhet t’i frymëzojë të tjerët që të ndajnë pasionin e tyre në këtë rrugëtim të përbashkët.
Qëllimi i kësaj ekspozite është t’i shtjellojë nuancat e pozitës së grave në Kosovë dhe t’i shpalosë, çmojë dhe njohë kontributet e tyre të shumëllojshme nëpër aspekte të ndryshme të shoqërisë, duke shërbyer kështu edhe si burim frymëzimi për shumë gra të reja në Kosovë.
Mundesh me e lexu edhe...
Thëniet e tyre frymëzuese do rrjedhin me shiritin e verdhë të lidershipit që karakterizohet nga stili inovativ, vlerat kreative dhe mendimet jashtë kutisë. Nga Majlinda tek Edita, nga Feridja tek Hiljminjeta, nga Kaqusha tek Teuta, nga Gordana tek Mirjeta e nga Mimoza tek Jeta, kemi shumë për të mësuar, për t’u frymëzuar, dhe për t’u krenuar.
Hapja e ekspozitës do të bëhet më 17 prill 2024, në ora 18:00, në Qendrën Barabar në Prishtinë.
Ky projekt implementohet nga Integra dhe Qendra Barabar, me mbështetjen e UNMIK-ut./Katror.info
Përgatiti:
