Instituti Kombëtar i Shëndetësisë Publike të Kosovës (IKSHPK) ka bërë thirrje qytetarëve që të vaksinohen kundër gripit sezonal, duke paralajmëruar se intensiteti i rasteve të gripit ka kaluar pragun epidemik, por është ende në aktivitet të lartë qarkullimi, shkruan Katror.info.
Sipas IKSHPK-së, situata ka shkaktuar rritje të fluksit të qytetarëve që kërkojnë ndihmë mjekësore. Gripi sezonal, siç thekson Instituti, është një sëmundje akute infektive që mund të shkaktojë komplikime serioze shëndetësore, sidomos te fëmijët, të moshuarit dhe personat me sëmundje kronike.
Ministria e Shëndetësisë ka siguruar 85,000 doza vaksine për këtë sezon, të cilat janë të disponueshme në qendrat e mjekësisë familjare në të gjitha komunat e Kosovës. IKSHPK apelon për vaksinim, duke theksuar rëndësinë e parandalimit përmes kësaj mase, sidomos për grupet më të rrezikuara, si punëtorët shëndetësorë, gratë shtatzëna, personat me sëmundje kronike, të moshuarit dhe fëmijët deri në 5 vjeç.
Mundesh me e lexu edhe…
Përveç vaksinimit, Instituti kërkon nga qytetarët që të respektojnë masat parandaluese si mbajtja e higjienës personale, shmangia e kontakteve me individë të sëmurë dhe evitimi i vendeve të mbingarkuara, duke theksuar rëndësinë e një ushqimi të shëndetshëm, aktivitetit fizik dhe gjumit të mjaftueshëm.
IKSHPK ka paralajmëruar gjithashtu që barnat kundër gripit duhet të merren vetëm me rekomandim mjekësor. Instituti i bën thirrje qytetarëve të tregojnë kujdes për shëndetin personal dhe atë publik, duke bashkëpunuar për parandalimin e përhapjes së gripit./Katror.info
Përgatiti:
