Përfaqësuesi i grupit qytetar “Asnjë Cent më Shumë”, Besnik Shabiu, ka ftuar qytetarët që të marrin pjesë në një protestë masive këtë të shtunë, më 12:00, si reagim ndaj rritjes së tarifës së energjisë elektrike, shkruan Katror.info.
Në një konferencë për media, Shabiu e ka cilësuar vendimin e Zyrës së Rregullatorit për Energji (ZRRE) si “të padrejtë dhe jo legjitim”, duke theksuar se ky është një veprim që shkel interesat e qytetarëve të Kosovës.
“Ne duam të sigurojmë qytetarët se aktiviteti ynë nuk është ndalur për asnjë moment dhe do të vazhdojmë deri kur të pezullohet ky vendim tërësisht të padrejtë. Zëri i qytetarëve është thelbësor dhe nuk do të ndalemi deri sa ta arrijmë fitoren. Protesta do të zhvillohet nesër në orën 12:00 dhe është më e rëndësishme se kurrë që qytetarët të japin mbështetje,” tha përfaqësuesi i grupit.
Mundesh me e lexu edhe…
Ai theksoi gjithashtu se masivizimi i protestës mund të çojë në përshkallëzim të veprimeve, duke përfshirë mundësinë e bllokimit të rrugëve dhe institucioneve, nëse kërkesat e qytetarëve nuk merrën parasysh. “Ne nuk dëshirojmë të japim mesazhe të tilla, por nëse është e nevojshme, do të përdorim çdo mjet për të siguruar që zëri ynë të dëgjohet,” shtoi ai.
Përfaqësuesi i grupit gjithashtu shprehu shqetësim për paralajmërimet e fundit për rritje të çmimeve të produkteve bazë, si mielli dhe buka, duke e cilësuar situatën si një ngarkesë shtesë për qytetarët. “Sot kemi dëgjuar për një rritje të mundshme të çmimit të miellit, duke arritur në 80 cent për kilogram. Kjo bëhet edhe më e rëndësishme, pasi qytetarët tani kanë nevojë më shumë se kurrë të reagojnë. Kjo protestë është një mundësi për të ndalur këtë rrugë të pasigurt.”
Në fund, ai bëri të ditur se grupi po shqyrton mundësinë e një padie ligjore kundër vendimit të ZRRE, duke shtuar se nëse nuk ndërmerren hapa, një nga mundësitë do të jetë organizimi i një nisme për bojkot të pagesave të faturave të energjisë elektrike. “Pjesëmarrja në protestë është më e domosdoshme se kurrë,” përfundoi ai./Katror.info
Përgatiti:
