Banka Qendrore e Republikës së Kosovës (BQK) ka njoftuar se Guvernatori Ahmet Ismaili, së bashku me ekipin e tij, ka pritur në takim misionin e Asistencës Teknike të Fondit Monetar Ndërkombëtar (FMN), të udhëhequr nga z. Yunhui Zhao nga selia qendrore e FMN-së.
Sipas njoftimit zyrtar të BQK-së, ky mision përfaqëson një hap të rëndësishëm në drejtim të forcimit të kapaciteteve të institucionit në parashikimin makroekonomik dhe analizën e politikave, në përputhje me praktikat më të mira ndërkombëtare. Projekti i asistencës teknike vjen pas diskutimeve të zhvilluara gjatë Takimeve Vjetore në Washington DC, ndërmjet Guvernatorit Ismaili dhe Institutit për Zhvillimin e Kapaciteteve (ICD) të FMN-së, si dhe pas kërkesës formale të BQK-së për këtë mbështetje dhe misionit hyrës të realizuar në shtator 2025.
Gjatë takimit, Guvernatori Ismaili ka informuar ekipin e FMN-së për zhvillimet e fundit në sektorin financiar të Kosovës dhe për reformat që janë ndërmarrë nga BQK-ja, me qëllim të forcimit të stabilitetit financiar dhe rritjes së efektivitetit të politikave. Ai gjithashtu ka theksuar pritshmëritë e institucionit nga ky angazhim, duke nënvizuar rëndësinë e forcimit të kapaciteteve analitike dhe mbështetjes së vendimmarrjes së bazuar në evidencë.
Mundesh me e lexu edhe...
Në njoftim theksohet se asistenca teknike do të ndihmojë në ndërtimin e kapaciteteve të qëndrueshme të brendshme dhe në rritjen e cilësisë së kornizës së politikave makroekonomike, në përputhje me Planin Strategjik të BQK-së. Kjo përfshin zhvillimin e skenarëve për diskutime të politikave dhe testime të stresit makro-financiar, të cilat do të mbështesin procesin e politikëbërjes së BQK-së.
Nga ana e tij, z. Yunhui Zhao ka prezantuar objektivat e dakorduara të projektit shumëvjeçar të asistencës teknike, duke theksuar se synimi kryesor është krijimi i një infrastrukture të qëndrueshme analitike për parashikime të besueshme dhe analiza skenarësh që do të informojnë procesin e vendimmarrjes.
Në përfundim, BQK-ja dhe ekipi i FMN-së kanë rikonfirmuar angazhimin e tyre për bashkëpunim të vazhdueshëm dhe për sigurimin e zbatimit të suksesshëm të këtij projekti.
BQK-ja ka vlerësuar lart mbështetjen e FMN-së, duke theksuar se projektet e asistencës teknike janë me vlerë të konsiderueshme për forcimin e kapaciteteve institucionale. /Katror.info
