“Ne kemi krijuar rrethana ku këtu është edhe puna, edhe jeta. Hajde jetoni duke punuar në Kosovë!”. Është kjo thirrja e Hamdi Malushaj për diasporën, e cila shpesh e sheh vendlindjen si një opsion të pamundur për t’u kthyer.
Afaristi Malushaj ka kaluar vetë një kohë të gjatë në mërgim duke punuar punë të ndryshme krahu, megjithëse në Kosovë studioi në Fakultetin e Makinerisë dhe Termoenergjetikës.
“Një punë që mundesh me e bo me laps në vendin tënd, atje është lopata laps. Këtu është lapsi, këtu je ti, ai që mundesh me bë punë të rëndësishme për vendin tënd”, thotë Malushaj.
Mundesh me e lexu edhe…
Duke parë mundësitë që Kosova ofron, Malushaj hapi kompanitë që ofrojnë shërbime të ndryshme kryesisht në bashkëpunim me kompanitë gjermane, Evrotarget dhe Kixxl, duke mundësuar mbi 1,200 vende pune nëpër qytete të ndryshme të Kosovës. Sot, kompanitë që drejton, janë bërë një urë kthimi për shumë bashkatdhetarë që jetonin jashtë vendit, veçanërisht në Gjermani.
“Diaspora është potencial i madh, ajo është një pasuri e madhe, ju duhet guximi me vendos për me provu jetën këtu. Le të vijnë investimet e tyre, puna është këtu ma e dinjitetshme ndoshta se në vendin e huaj. Përveç që mirëqenia jote sigurohet këtu edhe vepra jote të jetë pjesë e vendit tonë, objektin që e ndërton ti atje, atëherë mbetet këtu, nëse e ke ndërtu këtu‘’, shton ai.
Malushaj e di nga përvoja personale se çfarë do të thotë të punosh në Gjermani, por edhe se çfarë mund të ndërtohet në Kosovë.
“Kur jam shku ndonjëherë jasht për me bë pare, edhe unë kam punu. Edhe kam qenë në kohën e keqe të luftës, kam punu punë të rënda fizike. Asnjëherë s’jam luhatë, edhe atje në kanal me lopatë, edhe i dhunuar boll shumë, i pakonsideratë, por edhe në atë moment unë kam mendu për ditën e sotme, që kam me mbrri, edhe shtëpia e djegur me do drurë e kam mendu për me jetu në vend timin. Edhe më ka dalë e vërtetë ëndrra jem, por ia kam bë për çdo ditë hyzmetin (punën – përgatitjen). Një tullë në kala, për çdo ditë kam punu për qëllimim tim dhe kemi arritë mirë. Krejt çka i njoh unë atje në Gjermani, që i kam pa e jam përshëndetë me ta, jom ma mirë se ata atje”, thotë Malushaj.
Ai nuk e sheh dallimin mes dy vendeve si një hendek të pakapërcyeshëm, por si një mundësi për të aplikuar mësimet e marra jashtë në zhvillimin e vendit të tij.
‘’Kur e kam pa se edhe gjermanët ziejnë me ujë të nxehtë e nuk bëjnë diçka tjetër, të gjitha mundësitë atëherë i kam pa këtu, gjithçka e kam pa që na këtu mundemi me bo, atë që bëhet në Gjermani.’’
Nga një ëndërr personale në një ndryshim të prekshëm. Kur themeloi kompaninë, Malushaj e pa qartë potencialin që kishte Kosova.
‘’E kemi pasur një mundësi me e shndërru në ambientet çfare po i shihni këtu: edhe kafe me pi, po edhe punë me bo. Dhe ka dalë shumë mirë. Ka dalë thuja se në parashikime, kështu kemi menduar, kur e kemi themeluar, e kemi pa këtë potencial”, thekson Malushaj.
Sipas tij, një ndër sfidat më të mëdha ka qenë të fitohej besimi i kompanive të mëdha gjermane në tregun ballkanik. Për shumë vite, Kosova shihej me dyshim në aspektin profesional, por ai ka thyer këtë perceptim duke ndërtuar një reputacion të fuqishëm në tregun ndërkombëtar.
‘’Arritjet më të mëdha i konsiderojmë fitimin e besimit te kompanitë e mëdha në Gjermani. Ajo ka qenë sfidë e madhe me na besu neve në tregun ballkanik, në Kosovë, ka pasë shumë dilema se a mundemi ne me qenë ata që mundemi me kry punë për kompani të mëdha. Këtu kanë qenë ato sfida të mëdha”, thotë ai.
Malushaj e thekson se shumë bashkatdhetarë të tij që jetojnë jashtë nuk e kanë informacionin e duhur për zhvillimet në Kosovë. Ai i inkurajon ata që të marrin guximin të provojnë një jetë këtu, duke mos e parë vetëm si një mundësi pune, por si një mundësi për të ndërtuar diçka që ka vlerë dhe ndikim të drejtpërdrejtë në vendin e tyre.
‘’Për çdo ditë Kosova është më mirë se dje, për çdo vit më mirë se vitin e kaluar, gjithçka është më mirë. Pjesa që i bëjmë na keq është e dhunshme. Hajdeni këtu, përveç mirëqenies edhe objektet, projektet e mëdha, bëhen vlera të vendit tuaj. Pra prej bashkëpunëtorëve të mi të kthyer për një jetë më të mirë në Kosovë, e kam marrë dhe prodhu mesazhin ‘’më mirë këtu se atje.”
Hamdi Malushaj është shembulli i mirë që dëshmon se Kosova është vend i mundësive, dhe ku mund të ndërtosh një të ardhme të sigurt. Për ata që ende hezitojnë, motoja e fushatës së kompanive të tij lansuar më 17 shkurt është e qartë: “Qëndro ku t’flen zemra” dedikuar për mërgimtarët dhe punëtorët e rikthyer në vend. /Katror.info
Edicionin e #77 të plotë e gjeni këtu! 🙂
Përgatiti:
