Në kryeqytetin e Kosovës po zhvillohet një nga ngjarjet më të rëndësishme për tregun e punës – Panairi i Punës, ku mbi 130 biznese dhe institucione kanë prezantuar ofertat e tyre për më shumë se 500 vende të reja pune.
Ky panair tashmë është shndërruar në një traditë vjetore që ofron një platformë të drejtpërdrejtë për lidhjen mes punëkërkuesve dhe punëdhënësve. Bizneset pjesëmarrëse ofrojnë mundësi të ndryshme punësimi, duke synuar përfshirjen e të rinjve dhe profesionistëve në tregun e punës në Kosovë.
Zv.ministri i Financave, Punës dhe Transfereve, Agon Dobruna, theksoi rëndësinë e kësaj ngjarjeje si pjesë e vizionit për një treg pune gjithëpërfshirës.
Mundesh me e lexu edhe…
“Është një ngjarje që me vite ka shënuar sukses dhe impakt. Ky panair është rezultat i një bashkëpunimi të ngushtë mes institucioneve e kompanive. Motoja e këtij viti nuk është vetëm një sllogan, por thirrje për angazhim. Le të jetë ky një moment frymëzimi për secilin prej nesh,” tha Dobruna.
Ndërsa Ambasadori i Republikës Federale të Gjermanisë në Kosovë, Jörn Rohde, vlerësoi panairin si një mundësi konkrete për të rinjtë që të zhvillojnë karrierën e tyre.
“Është kënaqësi të jem këtu. Nuk e kam pritur që kaq shumë kompani do të marrin pjesë sot. Bashkë me partnerët po bashkëpunojmë për të implementuar projekte që mbështesin të rinjtë dhe punësimin,” tha ambasadori Rohde.
Në panair mori pjesë edhe Universiteti i Prishtinës “Hasan Prishtina”, i përfaqësuar nga Prorektorja për Zhvillim Institucional, Cilësi dhe Çështje Studentore, Majlinda Gjelaj. Ajo theksoi rëndësinë e përgatitjes së studentëve për tregun e punës dhe rolin që universiteti luan në këtë drejtim.
“Lidhja me tregun e punës dhe ofrimi i informacioneve të nevojshme janë pjesë integrale e misionit të universitetit. Është kënaqësi që shohim studentët tanë të interesuar për profilet që ofrojnë zhvillim në karrierë,” u shpreh Gjelaj.
Panairi do të vazhdojë edhe në ditët në vijim dhe pritet të mirëpresë mijëra vizitorë, kryesisht të rinj të interesuar për mundësi të reja punësimi dhe zhvillimi profesional./Katror.info
