Në Pallatin e Rinisë në Prishtinë është hapur sot edicioni i 25-të i Panairit Mbarëkombëtar të Librit “Prishtina 2025”, një ndër ngjarjet më të rëndësishme kulturore në Kosovë dhe më gjerë, shkruan Katror.info.
Nën moton “Inteligjenca rrjedh nga libri”, ky edicion jubilar organizohet nga Shoqata e Botuesve të Kosovës, me përkrahjen e Ministrisë së Kulturës, Rinisë dhe Sportit, Komunës së Prishtinës dhe Pallatit të Rinisë.
Ceremonia e hapjes është mbajtur sot në orën 12:00 dhe është transmetuar drejtpërdrejt nga Televizioni Publik i Kosovës – RTK, duke ndjekur një traditë të konsoliduar tashmë. Panairi do të qëndrojë i hapur për publikun deri më 15 qershor dhe mund të vizitohet çdo ditë nga ora 9:00 deri në orën 21:00, ndërsa ceremonia e mbylljes do të zhvillohet në orën 19:00 të ditës së fundit. Hyrja për të gjithë vizitorët është pa pagesë.
Mundesh me e lexu edhe...
Në këtë edicion marrin pjesë rreth 100 botues nga Kosova, Shqipëria, Maqedonia e Veriut dhe Diaspora, të cilët sjellin mbi 2000 tituj të rinj dhe rreth 6000 tituj të botuar në vitet e fundit. Panairi përfshin më shumë se 40 aktivitete, përfshirë promovime librash, takime me autorë, diskutime letrare dhe ngjarje kulturore, me praninë e emrave të njohur nga bota letrare dhe akademike. Ndër të ftuarit specialë këtë vit janë edhe shkrimtarë nga Franca.
Ky panair shënon gjithashtu disa përvjetorë të rëndësishëm për kulturën dhe historinë shqiptare, si 100-vjetori i lindjes së Martin Camajt, 150-vjetori i lindjes së Faik Konicës, 200-vjetori i lindjes së Pashko Vasës dhe 400-vjetori i lindjes së Pjetër Bogdanit. Këta përvjetorë do të përkujtohen me aktivitete të veçanta, diskutime dhe homazhe letrare.
Pritet që gjatë pesë ditëve të panairit, hapësirat e Pallatit të Rinisë të frekuentohen nga rreth 30 mijë vizitorë, përfshirë studentë, nxënës, qytetarë të pasionuar pas leximit si dhe figura të shquara nga jeta intelektuale, kulturore dhe politike e vendit./Katror.info
