Kjo makinë i mundësoi një burri australian me dështim të rëndë të zemrës të bëhet personi i parë në botë që largohet nga spitali me një transplant zemre artificiale.
Operacioni gjashtëorësh u zhvillua në fund të vitit 2024 në Spitalin St Vincent’s në Sydney, shkruan Reuters.
“Total Artificial Heart” nga BiVACOR imiton të dy anët e zemrës dhe qepet në organin ekzistues para se të ndizet, siç shpjegon kirurgu i transplantit, Dr. Paul Jansz.
Mundesh me e lexu edhe…
“Ky është ai momenti kur të gjithë mbajnë frymën dhe pastaj pajisja ndizet, funksionon dhe më pas fillon gradualisht të shkëputet pacienti nga aparati i mushkërisë dhe zemrës artificiale, i cili e ka mbajtur gjallë gjatë operacionit, dhe pompa e re merr kontrollin – dhe kështu ndodhi”, deklaroi mjeku.
Shpikur nga shkencëtari Dr. Daniel Timms, pajisja është krijuar si një urë lidhëse për të mbajtur pacientët gjallë derisa të jetë i mundur një transplant i zemrës nga një donator.
“Ai e mbajti pajisjen për 104 ditë para transplantit të tij, pra për rreth tre muaj e gjysmë, dhe gjatë kësaj kohe u lirua nga spitali – një arritje e paprecedentë për ne. Synimi ynë përfundimtar është t’i kthejmë këta pacientë në një jetë normale, dhe ai arriti të rikthehej në një cilësi normale të jetës jashtë spitalit. Kjo na jep shpresë të jashtëzakonshme se në të ardhmen nuk do të kemi nevojë t’i rikthejmë për transplant – ata mund të qëndrojnë jashtë dhe ta mbajnë pajisjen për pjesën tjetër të jetës së tyre”, pohoi ai.
Pacienti ishte i gjashti në botë që mori këtë pajisje të implantueshme, por i vetmi që u lirua nga spitali me organin artificial.
Të tjerët mbetën në spital duke pritur për transplante nga donatorë. /Katror.info
Përgatiti:
