Gjatë një vizite zyrtare në Kosovë, Drejtori Ekzekutiv i Helvetas Swiss Intercooperation, z. Melchior Lengsfeld, vlerësoi bashkëpunimin e gjatë me institucionet kosovare dhe riafirmoi përkushtimin e organizatës për të mbështetur zhvillimin e qëndrueshëm, përfshirjen e grave dhe të rinjve në ekonomi, si dhe forcimin e qeverisjes lokale.
Z. Lengsfeld u prit nga Kryeministri në detyrë i Kosovës, Albin Kurti, me të cilin diskutoi për bashkëpunimin ndërmjet Qeverisë dhe Helvetas, zhvillimet politike dhe socio-ekonomike në vend, si dhe rolin e rëndësishëm të diasporës kosovare në Zvicër.
Në takim u vlerësua mbështetja afatgjatë e Helvetas në përmirësimin e qeverisjes lokale, zhvillimin ekonomik, përgatitjen e të rinjve dhe grave për tregun e punës, si dhe promovimin e tranzicionit të gjelbër, përmes projekteve të financuara nga Zvicra, Suedia, Bashkimi Evropian dhe donatorë të tjerë.
Mundesh me e lexu edhe...
Një fokus i veçantë i vizitës ishte rritja e përfshirjes së grave në tregun e punës dhe mbështetja e ndërmarrjeve të reja. Gjatë takimeve me sektorin privat dhe gra ndërmarrëse, z. Lengsfeld nënvizoi se Helvetas është e përkushtuar për të siguruar pjesëmarrje të barabartë të grave në jetën ekonomike.
“Në programet tona për qeverisje, zhvillim ekonomik dhe punësim, kemi arritur përparim të dukshëm në përfshirjen e grave, të cilat po marrin gjithnjë e më shumë role udhëheqëse si në institucionet komunale, ashtu edhe në sektorin privat. Megjithatë, ende mbetet punë për të arritur përfaqësim më të lartë,” tha z. Lengsfeld.
Ai shtoi se: “Në Kosovë pashë të rinj dhe gra që ndërtojnë biznese, ndikojnë në komunitetet e tyre dhe ndryshojnë narrativën për rolin e tyre në ekonomi. Kur të rinjve dhe grave u jepet hapësirë për zhvillim, zhvillohet e gjithë shoqëria.”
Gjatë vizitës, z. Lengsfeld u takua edhe me Kryetarin e Komunës së Drenasit, Ramiz Lladrovci, ku u diskutua mbështetja që Helvetas ofron për komunat përmes projektit DEMOS, rëndësia e Grantit të Performancës në përmirësimin e shërbimeve për qytetarët dhe përfshirja e grupeve të margjinalizuara në vendimmarrje.
Helvetas është aktive në Kosovë që nga viti 2001 dhe ofron përkrahje në fushat e qeverisjes së mirë, arsimit profesional, fuqizimit dhe punësimit të grave dhe të rinjve, zhvillimit të qëndrueshëm mjedisor dhe tranzicionit të gjelbër. Organizata synon të forcojë kapacitetet lokale dhe të përmirësojë cilësinë e jetës për qytetarët në mbarë vendin.
“Helvetas mbetet e përkushtuar që përmes programeve zhvillimore të donatorëve të mbështesë Kosovën drejt zhvillimit të qëndrueshëm, duke përdorur ekspertizën zvicerane, rajonale dhe lokale,” përmbylli z. Lengsfeld./Katror.info
