HibridLAB ka lansuar 5 aplikacione inovative, të cilat synojnë përmirësimin e imazhit të mediave digjitale në Kosovë dhe ofrimin e zgjidhjeve direkte për luftimin e keqinformimit në hapësirën digjitale.
Në konferencën e mbajtur me temë “Kundërvënie ndaj tregimeve të dezinformimit përmes inovacionit dhe të mësuarit nga përvoja”, Shkelzen Osmani, drejtor i Hobrid, shpjegoi se Hibrid Lab nisi si ide disa vite më parë, por u realizua në fund të vitit të kaluar falë mbështetjes nga Ambasada e SHBA-ve, me qëllimin për të luftuar dezinformimin përmes inovacionit dhe mësimit praktik.
Ndër të tjerash, ai theksoi se ishte e qartë që përfshirja e teknologjisë dhe krijimi i aplikacioneve ishte një hap i domosdoshëm për avancimin e projektit.
Mundesh me e lexu edhe…
“Si Hibrid, tashmë realizojmë pothuajse të gjitha aktivitetet që shërbejnë për rregullimin e informimit në hapësirën digjitale, duke filluar nga kontrolli i fakteve, artikuj edukues, trajnime, informacione, analiza të thella, raporte, emisione e shumëçka tjetër. Megjithatë, ishte e qartë se përfshirja në zgjidhje teknologjike dhe krijimi i aplikacioneve ishte diçka që duhej të ndodhte patjetër” tha ai.
Pjesë e kësaj konference për lansimin e këtyre aplikacioneve inovative ishte edhe Jennifer Lawson, Këshilltare për Çështje Publike nga Ambasada e SHBA-ve në Prishtinë, e cila e cilëson rolin e Kosovës si një lider rajonal në inovacion dhe në luftën për integritetin mediatik.
“Kjo iniciativë është thelbësore për t’iu përgjigjur sfidave që sjell përhapja e keqinformimit, dezinformimit dhe manipulimit të qëllimshëm të informacionit, si në nivel global ashtu edhe lokal, përmes këtij granti nga SHBA-të, synojmë të fuqizojmë qytetarët e Kosovës me mjetet dhe njohuritë e duhura për të angazhuar kritikisht me mediat dhe për të mbrojtur vlerat demokratike” tha ajo.
Në anën tjetër, Osmani tregoi për idenë e krijimit të një zgjidhjeje për audiencën kosovare e cila sipas tij ka pasur nevojë për aplikacione që ofrojnë zgjidhje direkte për të shmangur keqinformimin që vjen nga hapësira digjitale.
“Kosova ka përqindjen më të lartë të përdoruesve të internetit në rajon dhe ndër më të lartat në Evropë. Por, në të njëjtën kohë, ka edhe një sistem edukimi që, si përfundim, krijon kuadro me gjykim kritik që nuk janë shumë të zhvilluar, fatkeqësisht, kjo paraqet një rrezik të lartë. Duke pasur parasysh se ne si kosovarë shpenzojmë shumë kohë duke u informuar nga interneti, ndërkohë që vuajmë nga niveli i ulët i edukimit, vendosëm që t’u ofrojmë audiencës sonë zgjidhje direkte, përmes aplikacioneve, për të shmangur keqinformimin që vjen nga hapësira digjitale,” theksoi ai.
Ai gjithashtu foli për bashkëpunimin që Hibrid.info pati me studentët nga fusha të ndryshme, si teknologjia e informacionit, komunikimi dhe gazetaria, ku së bashku punuan për të gjetur zgjidhje për rregullimin e kësaj çështjeje. Ky proces u realizua në tri faza: faza e trajnimit intensiv dhe praktik, faza e inkubimit që përfshinte përzgjedhjen dhe zhvillimin e ideve, duke i monitoruar dhe mentoruar ato, dhe faza e fundit, faza e akselerimit, ku idetë më të mira u shndërruan në produkte më të qëndrueshme.
“Pas gjashtë muajsh punë intensive dhe mentorimi, Hibrid Lab ka finalizuar pesë aplikacione inovative: për transparencën e mediave, identifikimin e clickbait, verifikimin e pretendimeve, edukimin medial dhe informimin e besueshëm. Me mbështetjen e Ambasadës së SHBA-ve, kjo iniciativë është shndërruar në një histori suksesi, duke u bërë anëtare e plotë e Aleancës Globale për Inovacion në Media (GAM). Si i vetmi përfaqësues nga Evropa Juglindore, Hibrid Lab dëshmon angazhimin për të luftuar keqinformimin përmes inovacionit dhe teknologjisë” tha ai.
Platforma Hibrid.info, së bashku me programin e saj inovativ HibridLAB, është anëtarësuar në Aleancën Botërore të Inovacionit në Media [Global Alliance for Media Innovation – GAMI], pjesë e Asociacionit Botëror të Publikuesve të Lajmeve [World Association of News Publishers – QAN-IFRA], në shtator të këtij viti. /Katror.info
Përgatiti:
