Kali Przewalski, një specie e rrezikuar dhe simbol i ruajtjes së natyrës, ka kaluar një histori të jashtëzakonshme “ringjalljeje”.
Ky kalë i egër, i njohur për trupin e tij të shkurtër dhe të fortë, dikur endej lirshëm në stepat e Azisë Qendrore, por u zhduk nga natyra në vitet 1960 për shkak të humbjes së terrenit dhe gjuetisë intensive. Pas zhdukjes së tij në natyrë, disa individë të këtij kali mbetën në kopshtet zoologjike.
Në vitin 1977, u krijua një program ndërkombëtar për ruajtjen e kësaj specieje, që përfshinte shkëmbimin e individëve mes kopshteve zoologjike për të rritur diversitetin gjenetik.
Mundesh me e lexu edhe…
Në vitin 1992, 16 kuaj Przewalski u lanë në liri në Mongoli dhe që atëherë janë bërë përpjekje për t’i rikthyer edhe në Kinë dhe Kazakistan. Sot, rreth 2000 individë jetojnë në natyrë, shkruan Marisa Karabeci për Top Albania Radio.
Si u rikthye nga varri kali i rrallë i egër?
Një nga arritjet më të fundit është klonimi i një kalit Przewalski në Teksas, SHBA. Kjo teknikë mund të ndihmojë në rritjen e diversitetit gjenetik të popullatës së egër. Ky projekt është një bashkëpunim mes Kopshtit Zoologjik të San Diegos dhe institucioneve të tjera kërkimore. Klonimi është një hap i rëndësishëm në përpjekjet për të siguruar që kjo specie të mbijetojë përballë sfidave të shumta që has.
Kali Przewalski është më shumë se një specie; ai është një simbol i shpresës për shumë lloje të tjera që janë nën kërcënim. Iniciativat për ruajtjen e tij tregojnë se me angazhim dhe bashkëpunim ndërkombëtar, është e mundur të rikthehen specie që dikur ishin në prag të zhdukjes.
Përmes këtyre përpjekjeve, mund të sigurojmë që brezat e ardhshëm të kenë mundësinë t’i shohin këta kuaj unikë duke endur përsëri në natyrën e tyre. /Katror.info
Përgatiti:
