Hovenier: Mezi pres të bëj tifo për Kosovën dhe ShBA-në në Lojërat Olimpike

Jeff Hovenier, ambasador i ShBA-së në Kosovë, ka shkruar për Lojërat Olimpike që po mbahen në Francë.

Hovenier ka treguar se do të bëjë tifozllëk për ekipin e Kosovës në olimpiadë.

Looking forward to cheering on the Kosovo Olympic Team and of course @TeamUSA. Good luck to all! https://t.co/7LohCZuxS6

— Ambassador Jeff Hovenier (@USAmbKosovo) July 27, 2024

“Mezi pres të bëj tifo për ekipin olimpik të Kosovës dhe sigurisht ekipit të SHBA. Ju uroj fat të gjithëve!”, ka shkruar Hovenier.

Të premten në mbrëmje edhe zyrtarisht u hapën Lojërat Olimpike “Parisi 2024”, në ceremoninë madhështore në zemër të Parisit. Në lumin Sena defiluan mbi 8 mijë sportistë pjesëmarrës në ngjarjen më të madhe sportive. Por munguan medalistja e artë olimpike, Distria Krasniqi dhe boksierja më e mirë në Kosovë, Donjeta Sadiku. Në ceremoni nuk ishin as kryemjeshtri i xhudos, Driton Kuka dhe ndihmësja e tij, Majlinda Kelmendi.

Krasniqi dhe Sadiku kanë vendosur që të fokusohen në garat që i kanë. E para që nis përfaqësimin e Kosovës në ngjarjen që organizohet në kryeqytetin francez, do të jetë 25-vjeçarja Sadiku.

Donjeta bokson menjëherë të shtunën dhe ka zgjedhur të pushojë e të përgatitet për luftën e rëndësishme. Synimi i saj është medalja olimpike. Ajo vlerësohet boksiere me potencial të madh, por rrugëtimi deri te medalja do të jetë shumë i vështirë. Jo i pamundur.

Sadiku në meçin e parë në “Parisi 2024” do të ballafaqohet me boksieren nga Tajlanda, Thananya Somnuek. Meçi i takon kategorisë deri në 60 kilogramë.

Me këtë boksiere, Sadiku ishte ballafaquar më 8 shkurt të këtij viti. Por kishte pësuar humbje nga boksierja tajlandeze në çerekfinale të turneut “Strangja” në Bullgari. Tani synon revanshin.

Në rast se e kalon këtë kundërshtare, Sadiku më pas do të ballafaqohej me boksieren nga Kolumbia, Angie Paola Valdes Pana, ndërsa në çerekfinalen e mundshme, do të boksonte ndaj irlandezes Kellie Harrington.

Sadiku në “Parisi 2024” është me normë olimpike. Do të jetë garuesja e parë nga nëntë gjithsej sa janë në kryeqytetin francez, që do ta përfaqësojë Kosovën.

Për Sadikun është hera e dytë që merr pjesë në Lojërat Olimpike. Por për herë të parë paraqitet me normë.

Për herë të parë ishte pjesëmarrëse me ftesë të universalitetit në “Tokio 2020”. Por u ndal herët.

Sadiku normën olimpike për në “Parisi 2024” e siguroi në turneun kualifikues botëror që u mbajt në Busto Arsizio të Italisë në mars të këtij viti. Ajo kishte fituar në gjysmëfinale ndaj italianes Alessia Mesiano, ndërsa para saj kishte mposhtur edhe tri boksiere të tjera të kategorisë së saj.

25-vjeçarja është fituese e medaljeve në dy ngjarje të mëdha të boksit. Me medalje të bronztë ishte stolisur në evropian e botëror. Sukseseve synon t’ia shtojë edhe një medalje, më të vlefshmen në ngjarjet sportive./Katror.info