Këtë pasdite, në ambientet e Europe House Kosovo në Prishtinë, do të mbahet një masterklasë e veçantë udhëhequr nga pioneri i xhazit në Kosovë, Ilir Bajri, kompozitor, pianist dhe drejtor i Festivalit të Xhazit në Prishtinë, ku do të prezantohet platforma inovative Orchetools.
Ngjarja nis në orën 17:30 dhe pritet të zgjasë deri në 19:00.
Masterklasa do të fokusohet në prezantimin e Orchestools, një platformë digjitale me burim të hapur për krijimin dhe modifikimin e muzikës në kohë reale.
Mundesh me e lexu edhe...
Siç ka njoftuar Europe House Kosovo, kjo ngjarje synon të ofrojë një përvojë ndërvepruese për artistët, studentët dhe të apasionuarit pas muzikës digjitale dhe kompozimit eksperimental.
“Kjo masterklasë do të ofrojë një zhytje të thellë në mundësitë krijuese të Orchestools, një mjet frymëzues për artistët dhe dashamirët e muzikës që janë të pasionuar për kombinimin e mjeteve digjitale me shprehjen muzikore“, thuhet në njoftim.
Pas masterklasës, të pranishmit do të kenë mundësinë të marrin pjesë në një sesion të gjallë të muzikës xhaz me Bajrin dhe muzikantë të ftuar, si pjesë e festimeve për Ditën Ndërkombëtare të Xhazit.
Ky aktivitet është pjesë e iniciativave kulturore të Europe House Kosovo që synojnë të nxisin dialogun mes muzikës dhe teknologjisë, si dhe të mbështesin artistët vendorë në eksplorimin e mjeteve të reja krijuese. /Katror.info
Përgatiti:
