Ministria e Arsimit, Shkencës, Teknologjisë dhe Inovacionit (MAShTI) ka inauguruar sot dy çerdhe të reja në komunën e Gjakovës, duke rritur kapacitetet për edukimin e hershëm në këtë rajon, shkruan Katror.info.
Në lagjen Shishmon, është përuruar çerdhja e re me vlerë 79,530 euro, e cila do të mirëpresë 40 fëmijë. Ndërsa në fshatin Bishtazhin, është inauguruar një tjetër çerdhe, me investim prej 126,613.82 euro, e cila do të ofrojë shërbime për 70 vogëlushë.
Ministrja e Arsimit, Arbërie Nagavci, theksoi rëndësinë e këtyre investimeve për komunitetin lokal dhe për zhvillimin e fëmijëve në moshë të hershme. Ajo nënvizoi se deri tani, MAShTI ka investuar 11,835,812.42 euro në Gjakovë gjatë këtij mandati, duke përmbushur premtimet me përgjegjësi dhe integritet.
Mundesh me e lexu edhe…
“Çdo fëmijë në Republikën e Kosovës meriton më të mirën, dhe ne jemi të përkushtuar ta garantojmë këtë,” u shpreh ministrja Nagavci gjatë ceremonisë së inaugurimit.
Këto investime janë pjesë e strategjisë së MAShTI për të zgjeruar dhe përmirësuar infrastrukturën arsimore në mbarë vendin, me fokus të veçantë në edukimin parashkollor, duke siguruar kushte optimale për zhvillimin dhe mirëqenien e fëmijëve./Katror.info
Përgatiti:
