Instituti për Politika Zhvillimore (INDEP) do të mbajë të premten, më 23 maj, tryezën me temën “Nxitësit e mobilitetit rajonal në Ballkanin Perëndimor: Lëvizja e lirë e njerëzve”, në ambientet e EU House në Prishtinë, duke filluar nga ora 10:30, shkruan Katror.info.
Ngjarja synon të mbledhë politikëbërës, përfaqësues të institucioneve vendore dhe ndërkombëtare, organizatave të shoqërisë civile dhe sektorit privat, për të diskutuar përparimin dhe sfidat në zbatimin e marrëveshjeve të CEFTA-s që lidhen me mobilitetin rajonal në Ballkanin Perëndimor.
Tryeza e organizuar nga INDEP është pjesë e një serie eventesh që po zhvillohen në kryeqytetet e vendeve të SEE6 gjatë Javës së Mobilitetit (21–29 maj 2025). Qëllimi i tyre është të kontribuojnë në integrimin gradual të rajonit në Tregun e Vetëm të Bashkimit Evropian, përmes forcimit të bashkëpunimit rajonal dhe zbatimit të marrëveshjeve ekzistuese.
Mundesh me e lexu edhe…
Ngjarja mbështetet nga Ministria e Punëve të Jashtme e Gjermanisë dhe konsiderohet si një kontribut i rëndësishëm në përgatitjet drejt Forumit të 11-të të Lidhshmërisë, që do të mbahet në Tiranë, si dhe Samitit të Berlinit që këtë vit do të zhvillohet në Mbretërinë e Bashkuar, gjatë sezonit të vjeshtës.
Për më shumë informata apo interesim rreth pjesëmarrjes, të interesuarit mund të kontaktojnë INDEP përmes emailit: [email protected] ose në numrin e telefonit: +383 38 224 886. /Katror.info
Përgatiti:
