Agjencia për Informim dhe Privatësi (AIP), Zyra e Kryeprokurorit të Shtetit, Policia e Kosovës, Inspektorati Policor i Kosovës dhe Asociacioni i Gazetarëve të Kosovës kanë nënshkruar një marrëveshje bashkëpunimi ndërinstitucional për mbrojtjen e të dhënave personale në kontekstin e komunikimit publik.
Në njoftimin e AIP-së thuhet se, në kuadër të kësaj marrëveshjeje, institucionet do të angazhohen për parandalimin e publikimeve të paautorizuara të të dhënave personale në media dhe në publik, për forcimin e rregullativës përmes akteve nënligjore që rregullojnë mbrojtjen e të dhënave personale, si dhe për rritjen e kapaciteteve profesionale të zyrtarëve institucionalë dhe përfaqësuesve të mediave.
“Marrëveshja ka për qëllim të adresojë shqetësimet në lidhje me shpërndarjen apo publikimin e të dhënave personale në media dhe palë të treta, përveç në rastet kur një veprim i tillë është i bazuar në dispozita të qarta ligjore apo në një autorizim të posaçëm nga organi kompetent gjyqësor”, thuhet në njoftim.
Mundesh me e lexu edhe…
Në kuadër të zbatimit të marrëveshjes dhe detyrimeve ligjore, institucionet do të themelojnë një Grup Koordinues të përbashkët, i cili do të monitorojë zbatimin e marrëveshjes dhe do të ndërmarrë veprime për realizimin e detyrave dhe përgjegjësive institucionale për mbrojtjen e të dhënave personale të qytetarëve të Republikës së Kosovës./Katror.info
