Instituti Albanologjik i Prishtinës, konkretisht Dega e Etnologjisë, organizoi sot një tryezë shkencore kushtuar veprimtarisë së çmuar studimore dhe akademike të profesoreshës dhe etnologes së njohur, Drita Halimi Statovci, shkruan Katror.info.
Nga ora 10:00, në ambientet e Institutit, studiues, etnologë dhe bashkëpunëtorë të saj u mblodhën për të vlerësuar kontributin e saj të jashtëzakonshëm në fushën e etnologjisë shqiptare.
Me këtë rast, profesoresha Halimi Statovci u nderua me një mirënjohje nga ushtruesi i detyrës së drejtorit të IAP-së, Naim Berisha, dhe shefja e Degës së Etnologjisë, Angjelina Hamza Hasanaj, e cila mbajti edhe fjalën hapëse të tryezës.
Mundesh me e lexu edhe…
Gjatë këtij organizimi shkencor, studiuesit Lumnije Kadriu, Angjelina Hamza Hasanaj, Zanita Halimi, Valon Shkodra, Rini Useini dhe Arlinda Veliu Sadiku referuan mbi veprën dhe kontributin e profesoreshës Statovci, e cila njihet si etnologe e parë grua në Institutin Albanologjik, si dhe themeluese e studimeve universitare etnologjike në Universitetin e Prishtinës, respektivisht në Departamentin e Antropologjisë.
Kontributi i Drita Halimi Statovcit është konsideruar si një udhërrëfyes i pazëvendësueshëm për brezat e rinj të studiuesve dhe etnologëve shqiptarë./Katror.info
Përgatiti:
