Skema e Bashkimit Evropian Young Cell Scheme (YCS) hapi zyrtarisht Shkollën Verore të BE-së 2025, me temën qendrore “Inteligjenca artificiale dhe ndikimi i saj në qeverisje, shoqëri dhe siguri”, raporton Ekonomia Online.
Për katër ditë rresht, ekspertë vendorë dhe ndërkombëtarë, përfitues të bursave YCS dhe studentë nga gjithë vendi do të diskutojnë mbi sfidat dhe mundësitë që sjell AI në sektorë të ndryshëm të jetës publike.
“Inteligjenca artificiale nuk është më çështje e së ardhmes, por pjesë e përditshmërisë sonë,” u shpreh Andrra Nurkollari, presidente e Shoqatës së Alumni-ve të Skemës European Young Cell (EYCA) në Kosovë, gjatë fjalimit hyrës në ceremoni.
Mundesh me e lexu edhe…
“Shkolla Verore e këtij viti besoj se nuk ka qenë ndonjëherë më e qëlluar në kohë, sepse po zhytemi në botën komplekse dhe emocionuese, por gjithashtu shumë të frikshme të inteligjencës artificiale. Nga administrata publike tek arsimi dhe nga produktiviteti personal tek manipulimi politik, AI është kudo, na pëlqen apo jo. Por bukuria e Shkollës Verore qëndron në faktin se nuk jemi këtu vetëm për ta lartësuar këtë fenomen, por për ta analizuar në mënyrë etike, ligjore, politike dhe sociale”, tha Nurkollari.
Rektori i Universitetit të Prishtinës, Arben Hajrullahu, theksoi nevojën që universitetet të përshtaten me zhvillimet teknologjike, duke vënë theksin tek sfidat që sjell AI në arsimin e lartë.
“Nuk ka më kuptim t’u kërkojmë studentëve në mënyrën klasike të shkruajnë punime seminarike dhe t’i dorëzojnë ato. E dimë problemin e ghostëriting-ut prej shumë vitesh. Por tani, me të vërtetë, duhet të shtrojmë pyetjen në universitete: pse kemi nevojë dhe si duhet të përshtatemi,” tha Hajrullahu, duke theksuar se AI është faza e pestë pas revolucionit industrial, elektrifikimit, automatizimit dhe digjitalizimit.
Zëvendësministri i Punëve të Brendshme, Bardhyl Dobra, foli për rolin e bursistëve të YCS në ndërtimin e institucioneve të forta dhe për rëndësinë që ka kjo temë për të ardhmen e Kosovës.
“Këtë vit i kushtohet një teme që nuk është vetëm aktuale, por është shumë e rëndësishme për të ardhmen tonë të përbashkët, që është inteligjenca artificiale. Bursistët që kanë dalë nga skema YCS tashmë më janë kontribues në ndërtimin e institucioneve të forta. Ju që do të vazhdoni këtë rrugëtim, them që do të jeni edhe liderët e së nesërmes,” u shpreh ai.
Ndërsa, Johannes Stenbaek Madsen, kryetar i Bashkëpunimit nga Zyra e BE-së në Kosovë, u fokusua tek mbështetja e vazhdueshme që BE-ja po jep për zhvillimin e kapitalit njerëzor në Kosovë përmes programit YCS.
Ai vlerësoi edhe rolin e Shoqatës së Alumni-ve të Skemës Young Cell në promovimin e vlerave evropiane dhe krijimin e një shoqërie më gjithëpërfshirëse dhe të arsimuar.
“Kjo iniciativë nuk ka të bëjë vetëm me ekselencën akademike, por me ndërtimin e një shërbimi civil profesional dhe të motivuar, i cili është i aftë të udhëheqë reformat kyçe. Duke investuar në arsimimin e të rinjve tanë, ne po investojmë në të ardhmen e Kosovës dhe në rrugën e saj drejt anëtarësimit në Bashkimin Evropian”, tha Madsen./Ekonomia Online/Katror.info
