Në muajt e ardhshëm, shumica e amerikanëve do të përqendrohen në mbledhjen e dokumenteve të tyre tatimore për të përfunduar deklaratat e tyre të tatimeve për vitin 2024.
Por, për këdo që blen dhe shet asete digjitale si Bitcoin, është e rëndësishme të dihet se viti 2025 do të jetë viti i parë fiskal kur transaksionet tuaja me kriptovaluta do të jenë subjekt i kërkesave për raportim nga palët e treta – që do të thotë se informacioni për to do t’i dërgohet IRS-it (Shërbimi i të Ardhurave të Brendshme) – nëse transaksionet tuaja kryhen në një llogari kujdestare në një platformë të centralizuar tregtare të kriptovalutave, siç janë Coinbase ose Gemini, shkruan cnn, përcjell Katror.info.
Kompanitë që do të kenë përgjegjësi për këtë raportim janë “brokerat që marrin në zotërim asetet digjitale që shiten nga klientët e tyre. Këta ndërmjetës përfshijnë operatorët e platformave tregtare të aseteve digjitale kujdestare, disa ofrues të portofolëve të strehuar të aseteve digjitale, kioskat e aseteve digjitale dhe disa përpunues të pagesave të aseteve digjitale (PDAPs),” vuri në dukje IRS-i në faqen e saj.
Ndërmjetësit do të mbajnë informacion mbi blerjet dhe shitjet e kriptovalutave në llogarinë tuaj gjatë gjithë vitit dhe do ta raportojnë atë në një formular të ri – 1099-DA. Kur të përfundojë, ky formular do t’ju dërgohet juve dhe IRS-it në fillim të vitit 2026.
Ashtu si informacioni nga format e tjera 1099 që mund të merrni – p.sh., për të ardhurat nga dividentët dhe interesat, ose për fitimet dhe humbjet në kapital – informacioni nga 1099-DA duhet të përfshihet në deklaratën tuaj të të ardhurave për vitin 2025, të cilën do ta dorëzoni vitin tjetër. Nëse nuk e përfshini, IRS-i do ta vërejë këtë sepse do të ketë informacionin dhe do ta përdorë për të vlerësuar detyrimin tuaj tatimor.
Sa i përket bazës së kostos – që është çmimi me të cilin blini një aset kripto dhe përdoret për të përcaktuar fitimet tuaja të tatueshme, nëse ka, kur e shisni atë – ndërmjetësit në fakt nuk do të kenë detyrim të raportojnë informacionin e bazës së kostos deri në vitin fiskal 2026, tha Jessalyn Dean, zëvendëspresidente e informacionit tatimor në Ledgible, një ofrues i softuerit të taksave për kriptovaluta. /Katror.info
Përgatiti:
