Inspektorati Policor i Kosovës respektivisht Departamenti i Hetimeve njofton se pas publikimit të shkrimeve në medie për pjesëmarrje të zyrtarëve policorë në tubime të natyrës politike, sipas detyrës zyrtare ka iniciuar procedura disiplinore për dy raste të ndara ku janë përfshirë një gradë e kolonelit policor dhe një major.
“IPK në njërin rast ka rekomanduar suspendimin e kolonelit policor me dyshimin për pjesëmarrje në tubim të natyrës politike kurse rastin e majorit (me të njëjtat dyshime) e ka përcjellë për trajtim disiplinor në Policinë e Kosovës.
Ndërkaq, Arianit Koci, avokati i njërit të të suspenduarve ka reaguar lidhur me këtë rast, duke shtuar se klienti i tij është suspenduar gabimisht, dhe se nuk ka qenë pjesë e asnjë tubimi me natyrë poltike.
Mundesh me e lexu edhe...
Ai gjithashtu ka deklaruar se fotografia në fjalë është falsifikuar, duke konfirmuar se ka bërë dorëzimin e një kallëzimi penal për manipulimin e fotografisë, duke theksuar se posedon prova materiale që vërtetojnë akuzën për falsifikim.
Pas këtij rasti, IPK ka bërë thirrje që zyrtarët policorë të mos përfshihen në tubime elektorale.
“Duke u bazuar në rëndësinë e jashtëzakonshme të një institucioni policor të pavarur dhe të pandikuar politikisht, IPK bën thirrje publike për të gjithë zyrtarët policorë që të qëndrojnë të paanshëm dhe larg aktiviteteve politike apo tubimeve parazgjedhore.”, thuhet në njoftimin e IPK-së.
“Roli i Policisë është kyç në garantimin e rendit dhe sigurisë për të gjithë qytetarët pa dallim, dhe çdo përfshirje apo perceptim i përfshirjes së zyrtarëve policorë në aktivitete politike mund të dëmtojë besimin e publikut në këtë institucion jetik./Katror.info
Përgatiti:
