Po vjen vera kah dera. Ose së paku kah kapixhiku se koxha ftoft osht e koxha shi po bjen. E na javën po ja nisim me ritme që paralajmërojnë verën në Lily’s, ku DJ dhe producenti belg Ekany, i ftuar nga kolektivi Kultura, vjen me bo muzikë pak elektro, pak hiphop pak afrobeats. Të dilleve, braseria “Juliette of the Spirits” ja ka nisë me ofru brunch për trup e shpirt, me prosecco që s’ndalet dhe muzikë t’mirë – “Urban Brunches” është rituali i ri i të dielës në Prishtinë.
Nëse po doni me u frymëzu edhe me ble diçka ndryshe, më 1 qershor Project Space Sekhmet organizon pazar me art, gjëra të veçanta, tarot, muzikë e ushqim – një flea market me shumë shije.
Të shtunën, në Posht’, Lekë Berisha kthehet në shpi për me qit një tjetër natë me vibe të mirë nën tokën kreative të Lavjerrësit. Për artdashësit kemi edhe ekspozitë te galeria Flori, e cila po i hap dyert për ekspozitën “Pozicionet” me Driton Hajredinin, Arbnor Karalitin dhe Naim Spahiun, ndërsa Instituti Albanologjik hap javën më serioze dhe interesante për studiuesit e kulturës shqiptare: “Java e Albanologjisë”. Për ata që kërkojnë përjetime muzikore klasike, më 30 maj në Sallën e Kuqe ofrojmë tingujt e bukur të Chopin Piano Fest me pianistën Sofya Gulyak dhe dirigjentin Peter Valentovič në një mbrëmje të dedikume Tchaikovskyt.
Mundesh me e lexu edhe…
Ndërkohë, në Shqipni, Rona Nishliu dhe Gent Rushi udhëtojnë me projektin JALBOZ nga Shkodra, kah Korça e në Tiranë për me rikriju trashëgiminë muzikore shqiptare përmes xhazit. Në Tiranë po ashtu mundeni me përjetu premierën dyfishe të baletit në Teatrin e Operas: “Kaleidoscope” dhe “Suitë në Re”, ose me u zhyt në botën e jazzit me legjendën Enrico Rava dhe bandën e tij Fearless Five.
Shkurt e shqip: nga brunchi deri te baleti, kjo javë vjen e pasun, e gjallë dhe me plot mundësi për me jetu (pran)verën urbanisht.
Me kcy: Party me DJ Ekany / Kultura House te Lilly’s, Prishtinë
Kolektivi Kultura osht themelu para do kohe me qëllim “me paraqit një pikëpamje direkte dhe të paimprovizume të shoqnisë”. Eventin e ardhshëm e kanë me DJ-in dhe producentin Ekany nga Brukseli, që vjen për herë të parë në Kultura House dhe për herë të dytë në Prishtinë. Ekany osht i njoftun për ndërthuje të ritmeve elektronike, hip-hopit, afrobeat dhe tingujve të skenës clubbing, edhe përgjatë viteve e ka fitu mbështetjen e emnave si James Blake, Jyoty dhe Damso. Prej amapiano (uhh po sa shumë na pëlqen) e deri te UK funky, prej baile e deri te future beats, setet e Ekany i thejnë kufijtë me groove të thellë. Të mërkurën, me 28 maj po vjen në Lily’s, ku Kultura synon me bo “një laborator të hapun ritmesh—ku tingulli takon shpirtin dhe netët e verës nisin.”
Me hangër, me pi e me kcy: Urban Brunches / Juliette of the Spirits, Prishtinë
Brunchi osht ajo periudha e hangërmes në mes mëngjezit dhe drekës, zakonisht mas nëj nate pak ma të gatë, edhe konsiston shpesh prej 90% prosecco ose mimosa dhe 10% ushqim. E tash braseria e bukur e Prishtinës ‘Juliette of the Spirits’ e ka nis çdo të dielle serinë e “Urban Brunches” bashkë me Urban FM, me muzikë të mirë, ushqim super dhe natyrisht ujëvarra të proseccos e mimozave. Gjithsesi mënyrë e mirë me kalu të dillet me shoqni… Çdo të dille, nga 13:00 deri 17:00.
Me marrë pjesë: Pazar gjësendesh dhe veprave artistike / Project Space Sekhmet, Prishtinë
Sekhmet po organizon për herë të parë një pazar të vogël në hapsinën e tyne në Project Space Sekhmet. Pazari po organizohet me datë 1 Qershor 2025, nga ora 13:00 – 19:00. Përveç pazarit, do të ketë edhe muzikë, lexim të kartave tarot, pije dhe ushqim të shijshëm. Kështu që keni flea market, party dhe inspirim artistik – all in one.
Me pa: Ekspozitë kolektive “Pozicionet” / Flori Gallery te Prishtina Mall
Ekspozita “POZICIONET” po sjell tre zana të veçantë të skenës së artit bashkëkohor në Kosovë: Driton Hajredini, Arbnor Karaliti dhe Naim Spahiu secili me një qasje individuale permes pervojave te tyne tu reflektu “në të qenurit artist sot.” Ekspozita organizohet në galerinë relativisht të re ‘Flori’ që gjendet në Prishtina Mall, rrugës kah Lipjani.
Me dëgju: Koncert i Chopin Piano Fest: Sofya Gulyak & Peter Valentovich / Salla e Kuqe e Pallatit të Rinisë, Prishtinë
Chopin Piano Fest po vazhdon rrugëtimin muzikor, e këtë javë, në bashkëpunim me orkestrën e Filharmonisë së Kosovës, po e mbyll mujin me një koncert me vepra nga Tchaikovsky. Dirigjenti sllovak Peter Valentovič ka me drejtu koncertin, në të cilin ka m’u interpretu Koncerti nr. 1 për piano dhe orkestër i Tchaikovsky-it, me soliste pianisten e mirënjohun ndërkombëtarisht, Sofya Gulyak. Në pjesën e dytë të mbramjes ka m’u interpretu edhe Simfonia nr. 6 e Tchaikovskyt. Koncerti mbahet më 30 maj 2025, në Sallën e Kuqe të Pallatit të Rinisë, nga ora 19:30.
Me kcy: Party me DJ Lekë Berisha në Posht’ / Posht’, Prishtinë
Posht’ osht ai clubi i vockël sympatique nën hapsinën bashkpunuese Lavjerrës edhe e ka një program poashtu sympatique me emna ma shumë apo ma pak të njohun të muzikës elektronike në Kosovë e gjetiu. E Lekën e njofim krejt, kështu që e shtunja e fundit e majit (31.05) n’Posht’ premton me qenë bash qysh tham edhe n’fillim: sympatique.
Me dëgju: Seria e koncerteve JALBOZ nga Rona Nishliu & Gent Rushi / Shkodër, Korçë, Tiranë
Rona Nishliu dhe Gent Rushi sjellin JALBOZ, një seri të koncerteve që synon me i riinterpretu kangët nga Shkodra, Tirana dhe Korça, përmes xhazit dhe improvizimit muzikor. Super koncept me super performues. Organizatorët premtojnë “jë udhëtim muzikor që lidh të kaluarën me të tashmen, për të sjellë një frymë të re në skenën shqiptare.” Koncertet po mbahen në kuadër të Javës së Europës në Shqipni, me 27 Maj, 20:00 në Teatri Migjeni, Shkodër, me 28 Maj, 20:00 – Teatri “Andon Zako Çajupi”, Korçë dhe krejt në fund me 29 Maj, 20:00 – në Black Box, Tiranë. Hymja osht gratis.
Me marrë pjesë: “Java e Albanologjisë” / Institutit i Albanologjisë, Prishtinë
E mbaj në mend para do vjetve pat ardh një albanolog japonez me një ligjeratë që gjejke ngjashmëritë ne mes të ritualeve të pregaditjes së çajit në oda (koxha minimaliste) të Kosovës dhe dhomat gjithsesi minimaliste të Japonisë. Koxha intriguese o konë, qysh janë intriguse plot ligjerata që mundeni m’i dëgju në ngjarjen kryesore për albanologët nga shumë shtete që për një arsyje ose tjetër kanë vendos me kalu jetën tu na studiu neve, zakonet tona, gjuhën dhe historinë. “Java e Albanologjisë” osht ngjarje shkencore por mundeni me gjetë diçka për gjithkon. Temat sivjet jon: Sesioni i Historisë: “Ndërthurja e identitetit fetar te shqiptarët nga besimet pagane te pluralizmi bashkëkohor”, 26.05.; Sesioni i Folkloristikës dhe Etnomuzikologjisë: “Kënga si rrëfim, tekst, performancë dhe praktikë social-kulturore”, 27.05.; Sesioni i Letërsisë: “Kritika letrare shqipe 1945-1990”, 28.05.; Sesioni i Etnologjisë: “Kultura shqiptare dhe etnologjia urbane”, 29.05. dhe Sesioni i Gjuhësisë: “Për një leksikografi bashkëkohore”, 30.05.2025.
Me pa: Premierë baleti – “Kaleidoscope & Suitë në re” / Teatri i Operas dhe Baletit, Tiranë
Teatri i Operës dhe Baletit në Tironë ka program të pasun këtë javë, e na e përzgjodhem premierën me dy shfaqje në njo: Një mbramje, dy përralla klasike. E para osht “Kaleidoscope”, që vjen si vetë emni, një shpërthim ngjyrash dhe formash nga koreografi kanadez Peter Quanz. I krijum për American Ballet Theatre dhe sjellë për herë të parë në Shqipëri, ky balet është pasqyrimi i shpirtit në lëvizje. Nga ana tjetër, “Suitë në Re”, koreografia ma e re nga mjeshtri Alvaro Dule, mbi tingujt barokë të Handelit, vendos në skenë pesë balerinë që flasin nëpërmjet solove, dueteve dhe kuinteteve, një gjuhë trupi që ndërlidh klasicizmin me ndjeshmërinë bashkëkohore. Me 26, 27, 28 Maj – Ora 20:00.
Koncert: Jazz koncert Enrico Rava me Fearless Five / Qendra kulturore pranë Katedrales Ortodokse, Tiranë
Po e përmbyllim me Tiranë kësaj rradhe. Bohuni gati për një mbrëmje unike jazzi me legjendarin Enrico Rava, përnime një ikonë e skenës ndërkombëtare të jazzit, i cili së bashku me Fearless Five kanë me pru në skenë një koncert plot emocion, liri dhe bukuri të pastër zanore. Një eksperiencë unike që e çon magjinë e jazz-it në një nivel tjetër. Koncerti mbahet te Katedralja ortodokse, me 27 maj në ora 20:00, organizum nga Instituti Italian i Kulturës.
Ciao ragazzi e shihemi javën e ardhshme. Kiss
Marrë nga Suzanne Podcast.
