‘Jeta dhe Arti’, punëtori në Galerinë Qahili kushtuar ndërgjegjësimit për kancerin e gjirit

Në Galerinë Qahili janë projektuar 3 punëtori në cilat janë realizuar krijime të punimeve grafike duke fuqizuar shpirtin dhe origjinalitetin.

Sipas njoftimit nga Galeria Qahili, projekti “Jeta dhe Arti” është një udhëtim i thellë dhe emocionues nëpër artin që feston forcën, guximin dhe shpresën e grave që luftojnë kundër kancerit të gjirit.

” ‘Jeta dhe Arti’ do të shtjellohet përmes punëtorive që kanë për qëllim ofrimin e një hapësire kreative ku pjesëmarrësit mund të shprehin emocionet e tyre përmes artit, ndërsa rrisin ndërgjegjësimin për kancerin e gjirit”, thuhet në njoftimin e eventit të publikuar në Facebook.

Punëtoria e parë u mbajt më 22 tetor, 2024, me aktivitetin pikturimi si terapi relaksuese dhe hapësirë për të shprehur ndjenjat e përjetimet; punëtoria e dytë u mbajt më 29 tetor 2024, ku u realizuanë krijime të punimeve grafike duke fuqizuar shpirtin dhe origjinalitetin.

Ndërsa punëtoria e tretë do të mbahet më 5 nëntor 2024, ku planifikohet puna me qeramikë dhe krijmi i veprave artistike që simbolizojnë triumfin ndaj kancerit të gjirit.

Projekti mbështetet nga Ministria e Kulturës, Rinisë dhe Sportit dhe Komuna e Prishtinës.

Lidhur me këtë ka shkruar edhe Drejtoresha e Kulturës në Komunën e Prishtinës, Sibel Halimi, e cila këtë nismë e quajti fuqizim i shprehjes artistike për gratë dhe vajzat.

”Një përvojë frymëzuese me familjen Qahili në ambientin e tyre të mbushur me art dhe energji. Në këtë takim, pata kënaqësinë të bashkëbisedoj me Nitën, e cila udhëheq projektin “Jeta dhe Arti”, një nismë që synon rritjen e ndërgjegjësimit për kancerin e gjirit dhe fuqizimin e shprehjes artistike për gratë dhe vajzat”, ka shkruar ajo në Facebook.