Jimmy Kimmel do të ketë më shumë për të thënë në late-night show-in e tij. Disney dhe ABC do ta rikthejnë komedianin në skemën porgamire duke nisur nga e marta në mbrëmje, pas vendimit për ta pezulluar për një periudhë të pacaktuar emisionin “Jimmy Kimmel Live,” shkruajnë mediat amerikane, përcjell Katror.info.
“Të mërkurën e kaluar morëm vendimin të ndalonim prodhimin e emisionit për të mos e tensionuar më tej një situatë delikate në një moment emocional për vendin tonë. Ishte një vendim që e morëm sepse disa nga komentet u perceptuan si të pakohshme dhe për pasojë të pandjeshme,” tha kompania në një deklaratë. “Gjatë ditëve të fundit kemi zhvilluar biseda të kujdesshme me Jimmy-n dhe, pas tyre, vendosëm që emisioni të rikthehet të martën.”
Vendimi i Disney-t për të larguar një nga figurat e saj më të spikatura erdhi pasi dy rrjete të mëdha, Nexstar Media dhe Sinclair, njoftuan se do ta hiqnin programin nga transmetimi. Shkak ishte monologu i Kimmel-it të hënën e kaluar, ku ai bëri komente të lidhura me vdekjen e aktivistit konservator Charlie Kirk. Ky veprim pasoi sugjerimin e kryetarit të Komisionit Federal të Komunikimeve, Brendan Carr, i cili u shpreh se transmetuesit duhet të kufizonin Kimmel-in dhe të detyronin ABC-në ta hiqte nga skema programore.
Mundesh me e lexu edhe…
Megjithatë, pas pezullimit, Disney u përball me kundërshtime të forta nga komuniteti krijues. Të hënën, 400 personalitete — përfshirë emra si Martin Short dhe Tom Hanks, që kanë sjellë personazhe të paharrueshme për Disney — nënshkruan një letër të Unionit Amerikan për Liritë Civile (ACLU), duke dënuar këtë veprim si goditje ndaj lirisë së shprehjes në SHBA.
Mbrojtës të Amendamentit të Parë nga të dyja krahët politikë e kanë kritikuar situatën ditët e fundit. Vendimi për ta rikthyer Kimmel-in u miratua nga Bob Iger, CEO i Disney-t, dhe Dana Walden, bashkëdrejtuese e Disney Entertainment, sipas një burimi të afërt me çështjen. Po sipas këtij burimi, drejtuesit vepruan mbi bazën e interesit të kompanisë dhe jo nën presion të jashtëm. Ende mbetet e paqartë nëse të gjitha filialet e ABC-së do ta transmetojnë programin. Zëdhënësit e Nexstar dhe Sinclair nuk ishin të disponueshëm për koment.
Nuk dihet nëse Kimmel do të kërkojë falje për komentet e tij, por çdo gjë për të cilën ai dhe drejtuesit e Disney-t janë dakorduar do të bëhet publike të martën në mbrëmje. Në të kaluarën, drejtues të emisioneve të vonshme kanë qenë të detyruar të kërkojnë ndjesë për deklarata që kanë ofenduar publikun — mes tyre David Letterman, Bill Maher dhe Samantha Bee, të cilët shprehën keqardhje për batuta që sollën më shumë zemërim sesa të qeshura./Katror.info
Përgatiti:
