Kadetët e Qendrës për Studime Universitare (QSU) të Forcës së Sigurisë së Kosovës kanë përmbyllur me sukses ushtrimin praktik “Qielli i Shqiponjave 2025”, një vlerësim gjithëpërfshirës i aftësive taktike dhe përgatitjes profesionale të tyre, shkruan Katror.info.
Kadetët e vitit të katërt, të cilët janë në prag të diplomimit, demonstruan gatishmërinë për të shërbyer si oficerë të rinj, duke aplikuar me efikasitet përvojën dhe aftësitë e fituara gjatë katër viteve studimi dhe trajnimi në QSU. Ndërkohë, kadetët e vitit të tretë u dalluan për përkushtimin dhe disiplinën, duke përfituar përvojë të vlefshme drejt përgatitjes për vitin e fundit dhe sfidat që i presin.
Ushtrimi u vëzhgua nga afër nga Drejtori i NALT-it, Gjeneral brigade Sven Lange, dhe Komandanti i Komandës së Doktrinës dhe Stërvitjes, Gjeneral brigade Jeton Dreshaj. Të dy udhëheqësit vlerësuan nivelin profesional të demonstrimit, disiplinën e lartë dhe përkushtimin e kadetëve, duke riafirmuar mbështetjen institucionale për zhvillimin e tyre./Katror.info
