Konsumimi i moderuar i kafesë dhe çajit mund të ulë rrezikun e demencës dhe të ngadalësojë rënien e funksioneve kognitive, sipas një studimi të ri të publikuar në JAMA.
Hulumtimi, i cili përfshiu mbi 130,000 pjesëmarrës dhe zgjati deri në 43 vjet, tregon se dy deri tre filxhanë kafeje të kafeinës ose një deri dy filxhanë çaj në ditë lidhen me një rrezik më të ulët të demencës dhe me ruajtje më të mirë të shëndetit të trurit, shkruan Euro News, transmeton Katror.info.
“Kur kërkonim mjete të mundshme për parandalimin e demencës, menduam se diçka aq e përhapur si kafeja mund të jetë një ndërhyrje premtuese dietike,” tha Daniel Wang, autor i lartë i studimit dhe asistent profesor në Harvard Medical School.
Mundesh me e lexu edhe...
Çfarë tregoi studimi?
Gjatë periudhës së ndjekjes, 11,033 pjesëmarrës zhvilluan demencë. Rezultatet treguan se:
- Konsumimi i kafesë dhe çajit me kafeinë lidhej me një rrezik më të ulët deri në 18% për demencë.
- Përfitimet ishin më të forta tek ata që konsumonin sasinë e moderuar, por edhe konsumimi më i lartë nuk tregoi efekte negative dhe duket se ofronte përfitime të ngjashme.
- Pjesëmarrësit që pinin kafe raportuan gjithashtu më pak simptoma të rënies së kujtesës, 7.8% kundrejt 9.5% te ata që nuk konsumonin.
Pse mund të jetë kaq e dobishme?
Ekspertët thonë se kafeja dhe çaji përmbajnë përbërës bioaktivë si polifenolët dhe kafeina, të cilët mund të ndihmojnë në:
- uljen e inflamacionit,
- zvogëlimin e dëmtimeve qelizore,
- mbështetjen e funksioneve kognitive.
Studime të mëparshme kanë lidhur kafeinën me përmirësim të ndjeshmërisë ndaj insulinës dhe funksionit vaskular, çka mund të kontribuojë në mbrojtjen e trurit.
Kufizimet e studimit
Autorët theksojnë se, si studim vëzhgues, nuk mund të provohet një lidhje shkakësore direkte. Gjithashtu, studimi nuk mori parasysh:
- llojet e ndryshme të kafesë apo çajit,
- mënyrën e përgatitjes,
- nivelin e pjekjes,
- origjinën e produktit.
Parandalimi i demencës mbetet kyç
Demenca zhvillohet gradualisht, nga rënia subjektive e kujtesës deri te mangësitë kognitive të lehta dhe më pas te demenca klinike. Për këtë arsye, parandalimi i hershëm është thelbësor, pasi trajtimet aktuale ofrojnë përfitime të kufizuara pas shfaqjes së simptomave.
Wang përmend se, megjithëse rezultatet janë inkurajuese, efekti është i vogël, dhe konsumimi i kafesë ose çajit është vetëm një pjesë e strategjisë për ruajtjen e shëndetit të trurit.
“Studimi ynë sugjeron se konsumimi i kafesë ose çajit me kafeinë mund të jetë një copë e atij puzzle,” tha ai.
Burimi: Euro News
Përktheu dhe përshtati: Katror.info
