Revolucioni teknologjik elektrik pritet të çojë karburantet fosile drejt një rënieje të pakthyeshme deri në vitin 2030, duke hapur një epokë të re të sigurisë energjetike, parashikon organizata Ember në raportin e saj më të fundit.
Raporti thekson se teknologjitë e pastra – përfshirë energjinë diellore, atë me erë dhe bateritë – mund të zëvendësojnë mesatarisht rreth 70% të importeve të karburanteve fosile.
Ember identifikon Kinën si “shtetin e parë elektroteknologjik” në botë, duke theksuar se ajo përfaqëson gjysmën e instalimeve globale të paneleve diellore, 60% të shitjeve të automjeteve elektrike dhe dy të tretat e rritjes globale të kërkesës për energji elektrike që nga viti 2019, shkruan Positive News, përcjell Katror.info.
Mundesh me e lexu edhe…
“Kina është shteti kyç në sistemin global, dhe kërkesa për energji elektrike nga burime fosile në Kinë ka rënë me 2% në gjysmën e parë të vitit 2025,” thuhet në raport. “Nëse trendet aktuale vazhdojnë… kërkesa për karburante fosile do të hyjë në rënie të qëndrueshme deri në vitin 2030.”
Në kontrast, Ember vëren se SHBA-të po “lihen pas” nga vende në zhvillim si Vietnami dhe Namibia, sa i përket përqindjes së energjisë diellore në miksin energjetik vendas.
Pavarësisht premtimeve për uljen e emetimeve të karbonit, emetimet globale vazhdojnë të rriten, dhe shumica e vendeve duhet të kryejnë edhe shumë punë për ti përmbushur objektivat e tyre klimatike. Sipas shkencëtarëve të klimës, rënia e përdorimit të karburanteve fosile është më urgjente se kurrë./Katror.info
