Korporata Energjetike e Kosovës (KEK Sh.A.) ka njoftuar se duke filluar nga data 1 gusht 2025, do të nisë funksionimin Departamenti për Sigurinë Fizike të Objekteve, një njësi e re që do të operojë brenda vetë institucionit, shkruan Katror.info.
Ky vendim vjen pas një periudhe mbi 20-vjeçare të bashkëpunimit me kompani private të sigurimit, duke shënuar një kthesë strategjike të ndërmarrjes për të rikthyer këtë funksion në kontroll të plotë institucional.
Sipas KEK-ut, themelimi i këtij departamenti është pjesë e një qasjeje të re për forcimin e kontrollit të brendshëm, garantimin e sigurisë së aseteve kritike energjetike dhe menaxhimin më efikas të rrezikut.
Mundesh me e lexu edhe…
Punonjësit e rinj të sigurimit, të cilët do të jenë të integruar si staf i rregullt i KEK, do të gëzojnë kushte të përmirësuara pune dhe mbështetje të plotë institucionale.
Korporata thekson se ky hap përfaqëson një avancim të rëndësishëm drejt modernizimit të operacioneve energjetike dhe ndërtimit të një sistemi të qëndrueshëm dhe të besueshëm të sigurisë.
“Përmes kësaj strukture të re, KEK jo vetëm që rrit nivelin e mbrojtjes së infrastrukturës kritike, por edhe afirmon përgjegjësinë e saj për garantimin e funksionimit të pandërprerë dhe të sigurt të kapaciteteve energjetike në vend,” thuhet në njoftim./Katror.info
