Agjencia për Investime dhe Përkrahjen e Ndërmarrjeve në Kosovë (KIESA), në kuadër të Ministrisë së Industrisë, Ndërmarrësisë dhe Tregtisë (MINT), ka mbajtur sot një sesion informues me përfaqësues të bizneseve, me rastin e lansimit të thirrjes publike për përkrahjen financiare të Ndërmarrjeve Mikro, të Vogla dhe të Mesme (NMVM) në sektorin e Industrisë Kreative, shkruan Katror.info.
Skema e mbështetjes financiare është rezultat i bashkëpunimit ndërinstitucional ndërmjet MINT-it përmes KIESA-s dhe Qeverisë së Dukatit të Madh të Luksemburgut, e cila do të zbatohet në partneritet me Programin për Zhvillim të Kombeve të Bashkuara (UNDP). Buxheti i përgjithshëm i kësaj skeme është 1 milion euro.
U.d. i Drejtorit të Përgjithshëm të KIESA-s, z. Zef Dedaj, theksoi rëndësinë e kësaj mbështetje për fuqizimin e sektorit të Industrisë Kreative dhe inkurajoi të gjitha ndërmarrjet e interesuara të aplikojnë për të përfituar nga kjo mundësi që synon rritjen e kapaciteteve dhe zgjerimin në treg.
Mundesh me e lexu edhe…
Gjatë sesionit, pjesëmarrësit u njoftuan në mënyrë të detajuar me të gjitha aspektet e aplikimit, përfshirë kriteret e pranueshmërisë, procedurat dhe dokumentacionin e nevojshëm. Procesi i aplikimit u prezantua edhe përmes një demonstrimi praktik në platformën elektronike e-Kosova, ku do të realizohet edhe aplikimi.
Thirrja për aplikim mbetet e hapur deri më 22 gusht 2025, dhe aplikimi mund të bëhet në këtë link: https://rks-gov.net/670./Katror.info
