Dy studio arkitekturore, MVRDV dhe Zecc Architecten, kanë fituar konkursin për transformimin e kishës së Shën Françeskut të Asizit në Heerlen në një pishinë publike. Projekti, i quajtur “Uji i Shenjtë”, i jep objektit të braktisur një funksion të ri shoqëror, duke ruajtur elementët historikë të monumentit të mbrojtur.
Planet përfshijnë një dysheme të rregullueshme në pishinë, që lejon organizimin e aktiviteteve të ndryshme, përveç notit. Kisha, e ndërtuar mbi 100 vjet më parë, pushoi së funksionuari në vitin 2023, duke i hapur rrugë këtij rishfrytëzimi, shkruan Good News Network, transmeton Katror.info.
Dizajni inovativ mundëson që vizitorët të kalojnë përgjatë korridoreve historike të kishës për të arritur te dhomat e zhveshjes dhe restoranti, ndërsa muret prej xhami ndajnë këto pjesë nga pishina e klimatizuar.
Mundesh me e lexu edhe…
Ulëset tradicionale të kishës do të ripërdoren si pjesë e mureve ndarëse: në njërën anë si ulëse për notarët, në anën tjetër si tavolina për vizitorët. Foltorja e vjetër do të shërbejë si vendqëndrim për rojën e pishinës.
Dyshemeja e rregullueshme mund të ngrihet për të mbuluar tërësisht pishinën dhe për ta kthyer hapësirën në një sallë për aktivitete kulturore dhe shoqërore. Në një tjetër opsion, mund të mbulohet me një shtresë të hollë uji që pasqyron kishën, duke krijuar ndjesinë e ecjes mbi ujë.
“Me rritjen e numrit të kishave të braktisura, duhet të gjejmë ide të reja dhe kreative për këto hapësira,” thotë Winy Maas nga MVRDV. “Një pishinë publike është mënyrë perfekte për t’ua rikthyer funksionin shoqëror.”
Dyshemeja me mozaik, që do të përfshijë ngjyrat dhe motivet e kishës, do të krijohet në bashkëpunim me artistë lokalë, si pjesë e identitetit të Heerlenit të njohur për muralët e tij.
Një sfidë teknike ishte mbrojtja e materialeve historike nga lagështia. Kjo u zgjidh përmes mureve të xhamta që izolojnë pishinën nga pjesët e tjera të kishës. Kulmi do të izolohet nga jashtë, ndërsa brendësia me tulla dhe tavani prej druri do të ruhen dhe përmirësohen për akustikë më të mirë.
Ky projekt sjell një balancë të veçantë mes ruajtjes së trashëgimisë dhe inovacionit funksional./Katror.info
Përgatiti:
