Këshilli i Mediave të Shkruara ka reaguar lidhur me raportimin e gazetarëve për tragjedi, duke thënë se duhet të zhvillohet me kujdes dhe vetëm kur ka interes të lartë publik mbi çështjen
”Në këtë kontekst, për ata që janë prekur nga tragjedia, duhet të ketë një qasje të “mirëkuptimit, mbrojtje të privatësisë, mbulim të fytyrës dhe diskrecion”, thuhet në njoftim.
Sipas Kodit Etik, mediat duhet të respektojnë të drejtën e njerëzve për të mbajtur zi dhe duhet të raportojnë, duke treguar empati dhe vetëpërmbajtje.
Mundesh me e lexu edhe…
KMSHK, ka theksuar se mediat janë të obliguara të respektojnë vuajtjet e viktimave dhe ndjenjat e familjarëve të tyre, duke shtuar se mediat duhet të tregojnë maturi me fotografitë dhe pamjet, si dhe duhet të kenë në konsideratë ndjeshmërinë e publikut gjatë raportimit.
”Mediat duhet të respektojnë dinjitetin e viktimave dhe familjeve të tyre, duke mos i paraqitur ato në media fotografitë, videot apo incizimet tjera të të aksidentuarve, të të dhunuarve, të të vrarëve, të të vetëvrarëve apo personave të lidhur me ta, e në veçanti fëmijëve që janë pjesë e aksidentit, incidentit, fatkeqësisë natyrore apo veprës penale. Po ashtu, mediat e shkruara “edhe gjatë raportimit duhet të lejojnë njerëzit të mbajnë zi privatisht, duke i trajtuar me shumë kujdes ngjarjet e tilla”, thuhet në njoftimin e KMSHK-së në Facebook.
Një tjetër këshillë është se mediat nuk duhet që fotografitë ose videot nga vendi i ngjarjes t’i publikojnë pa mbuluar identitetin apo trupin e viktimave pas aksidentit, incidentit, dhunës, fatkeqësisë natyrore apo veprës penale. Publikimi i materialeve të tilla mund të konsiderohet fyerje për ndjenjat e familjarëve të viktimave dhe të ndjeshme për publikun.
Po ashtu, sipas KMSHK mediat e shkruara nuk duhet të publikojnë lajme me fotografi apo video ku paraqiten viktimat apo personat e zhdukur dhe të njëjtit në raportim të identifikohen me emër dhe mbiemër, përveç rasteve kur ka interes publik.
Në raportim, gazetarët dhe mediat duhet të kenë parasysh që është e nevojshme që të mbrohet identiteti i viktimave. Publikimi i identitetit të viktimave varet nga interesi publik dhe mbetet në diskrecionin e mediave, bazuar në kodin e etikës. Përshtatshmëria e materialeve mediatike është po ashtu e rëndësishme, dhe viktimave në fotografi e video duhet t’iu mbulohet fytyra ose të paktën pjesa e syve.
Gjithashtu, kërkohet kujdes gjatë raportimit për kufoma / trupa të vdekur, për të plagosur, pamje gjaku etj. Artikujt dhe storiet duhet të përmbajnë paralajmërimin për përmbajtjen mediale që ka të bëjë me përmbajtje të papërshtatshme ose të ndjeshme.
Këshilli i Mediave thekson se nuk duhet ekspozuar kategoritë e cenueshme të shoqërisë dhe gjendja emocionale e të afërmve të viktimave.
”Mediat duhet të kenë kujdes që të mbulojnë pjesët problematike, të ndjeshme, të fotografive ose videove. Jo gjithçka që prezantohet nga autoritetet – por jo vetëm – duhet marrë si e mirëqenë”, thuhet tutje në njoftim.
Në përfundim, gazetarët dhe mediat duhet të tregojnë kujdes se çfarë i ofrojnë publikut dhe të shmangin “raportimin sensacional”. /Katror.info
Përgatiti:
