Ambasada Britanike në Prishtinë ka hapur debatin për një temë të rrallë e shpesh të heshtur në Kosovë – menopauzën. Pikërisht në Ditën Botërore të Menopauzës, ambasada ka zgjedhur ta vendosë këtë çështje në qendër të vëmendjes, duke inkurajuar diskutim të hapur, mirëkuptim dhe mbështetje për gratë, shkruan Katror.info.
Ambasada ka njoftuar përmes një postimi në Facebook se ka zhvilluar takimin e dytë në një seri diskutimesh joformale mes grave dhe vajzave të stafit, për të folur hapur mbi stigmën që shoqëron periudhat e para, gjatë dhe pas menopauzës.
Gjatë takimit, pjesëmarrëset ndanë përvoja dhe këshilla praktike për menaxhimin e simptomave dhe për ruajtjen e shëndetit fizik e mendor, duke e bërë këtë hapësirë një vend reflektimi e mirëkuptimi. Në njoftim theksohet se në takimin e ardhshëm do të ftohen edhe pjesëtarët e tjerë të stafit, me qëllim që të nxisin dialog të hapur dhe gjithëpërfshirës rreth kësaj teme që prek çdo familje.
Mundesh me e lexu edhe…
Ambasadori britanik në Kosovë, Jonathan Hargreaves, iu bashkua kësaj nisme me një thirrje publike në Facebook, duke i ftuar edhe burrat të jenë pjesë e mbështetjes për gratë:
Burra! Sot është Dita Botërore e Menopauzës. Menopauza ndikon tek gratë, por edhe tek familjet, vendet e punës dhe komunitetet tona. Si aleatë meshkuj, mund të ndihmojmë duke krijuar hapësira ku gratë ndihen të dëgjuara dhe të mbështetura – duke treguar empati, mirëkuptim dhe respekt. Nuk dëgjoj shpesh të flitet për menopauzën në Kosovë – ndoshta ka ardhur koha ta thyejmë heshtjen dhe të qëndrojmë bashkë për shëndetin, dinjitetin dhe barazinë.
Përmes këtij diskutimi dhe mesazhit të ambasadorit, Ambasada Britanike në Prishtinë ka hapur një debat që mungon prej kohësh në hapësirën publike, duke e kthyer menopauzën nga një temë tabu në një bisedë të nevojshme për shëndetin, dinjitetin dhe barazinë gjinore./Katror.info
Përgatiti:
