Kolektivi “Marshojmë s’festojmë” ka lëshuar banerin ftues nga ndërtesa “Reporting House”, teksa u bë thirrje për protestë më 8 Mars në shenjë “solidariteti dhe përkujdesje për njëra-tjetrën”, raporton Ekonomia Online.
Aktivistja Latra Demaci thekson se lufta kundër dhunës strukturore dhe të përditshme vazhdon, duke u ushtruar nga patriarkati, kapitalizmi racist dhe pabarazitë globale.
Ajo rikujton rastet e fundit të dhunës ndaj grave në Kosovë, duke i cilësuar si pasoja të një sistemi shtypës që prek gratë në çdo aspekt të jetës.
Mundesh me e lexu edhe…
“Marsi po afron e ne rikujtohemi se lufta kundër dhunës strukturore e të përditshme vazhdon. Rikujtohemi se dhuna ushtrohet njëkohësisht nga patriarkati, kapitalizmi racist, pabarazitë globale dhe ideologjitë që cilësojnë disa trupa dhe mendje si “të paaftë. Vetëm gjatë kohëve të fundit jemi përballur me: Vrasjen e Erona Çoklit nga ish-burri i saj në Qendrën për Punë Sociale në Ferizaj në prill të vitit të kaluar, vrasjen e Gjuljeta Ukellës nga burri i saj në Pejë vetëm 5 ditë më vonë, vrasjen e gruas nga burri i saj në Graçanicë dhe tentimin për vrasje të gruas në Fushë Kosovë. Ndëshkimin e punëtoreve teknike të Kuvendit të cilat grevuan për paga dhe kushte dinjitoze të punës, Amnistimin e dhunës në familje për hir të spektaklit televiziv e jo vetëm, Dhunimin e gruas me probleme të shëndetit mendor, ndërsa ishte nën përkujdesjen e institucioneve në Gjilan, Dhunën dhe trafikimin e të miturës pas dështimeve të institucioneve për ta rehabilituar e mbrojtur. Këto nuk janë raste të izoluara, por pasoja tragjike të patriarkalitetit që mundëson dhunën fizike, emocionale, seksuale e ekonomike që ushtrohet mbi gratë në përditshmëritë tona private dhe publike. Qoftë në shtëpi, punë, shkollë, rrugë apo institucione, kjo është një thirrje të revoltohemi për njëra-tjetrën kundër indiferencës ndaj dhunës”, shtoi Demaci.
Për 8 Mars, Demaçi bën thirrje për protestë dhe marshim në ora 12:00 në sheshin “Zahir Pajaziti”, duke kërkuar dinjitet, siguri dhe drejtësi për të gjitha gratë dhe vajzat.
“Ky 8 Mars le të jetë për solidaritetin, jetën dhe përkujdesjen për njëra-tjetrën,” thekson ajo.
“Këtë 8 Mars, ejani të rizotohemi, të protestojmë e të marshojmë për dinjitetin, sigurinë dhe mirëqenien e të gjitha grave dhe vajzave. Të protestojmë për çrrënjosjen e të gjitha sistemeve të shtypjes në Kosovë dhe për të gjithë popujt. Të marshojmë të zemëruara dhe të zemëruar kundër kulturës së përdhunimit, cenueshmërisë së shtëpive dhe dhunës ndaj trupave dhe mendjeve me aftësi të kufizuara. Marshojmë për grevat si revoltë kundër kapitalizmit neoliberal. Marshojmë për drejtësi, për gratë rome, ashkalike e egjiptiane, ashtu siç ato e përcaktojnë lirinë e tyre. Për gratë trans e queer në shumëllojshmërinë e tyre. Për gratë myslimane që bartin besimin e tyre dukshëm. Marshojmë kundër kolonializmit, gjenocidit e luftës. Për një Palestinë, Kongo, Sudan e botë të lirë. Revoltën për njëra-tjetrën. Nga ora 12:00 në Sheshin ‘Zahir Pajaziti’, ky 8 Mars le të jetë për solidaritetin, jetën, përkujdesjen, për njëra-tjetrën”, shtoi ajo.
Ky baner është në kuadër të aktiviteteve të marshit për 8 mars./Katror.info
Përgatiti:
