Komuna e Lipjanit organizoi Panairin e katërt të Gjuhës, Artit, Shkencës dhe Teknologjisë, i cili u mbajt në sallën e sporteve në Lipjan, me pjesëmarrjen e 23 shkollave dhe 120 projekteve nga fusha të ndryshme.
Ky aktivitet shënoi edhe ditën e shkollës “Vëllezërit Frashëri”. Jakup Bahtiri, drejtor i kësaj shkolle, tha për EO se të gjitha përgatitjet janë bërë dhe projektet do të vlerësohen nga juritë profesionale. Ai shtoi se shkolla ka përvojë edhe në gara ndërkombëtare si në SHBA dhe Afrikën e Jugut.
“Sot është 10 qershori, Dita e Shkollës “Vëllezërit Frashëri”, njëherësh është përvjetori i katërt i Panairit të gjuhës, artit, shkencës dhe teknologjisë që organizohet në sallën e sporteve në Lipjan. Në nivel të komunës marrin pjesë 23 shkolla me 120 projekte. Secila shkollë ka projektet e tyre. Ne si shkollë i kemi bërë të gjitha përgatitjet. Në një fushë ka tri juri, që e vlerësojnë secilin projekt pastaj secili komisioner dhe i jepet çmimi i merituar atyre që meritojnë nga shkollat e ndryshme dhe nga nxënësit e ndryshëm. Presim rezultate jashtëzakonisht të mira, sepse kemi përvojë të tillë. Shkolla “Vëllezërit Frashëri” ka marrë pjesë edhe jashtë Kosovës në gara të tilla, si në Amerikë, Afrikën e Jugut, prandaj nxënësit janë të përgatitur, kanë ide kreative dhe inovative që të paraqesin projektet e tyre që do të hyjnë në punë në të ardhmen”, tha ai.
Mundesh me e lexu edhe…
Nxënësja Nuketa Zeqiri prezantoi projektin në fushën e matematikës, duke theksuar rëndësinë e përfshirjes së matematikës dhe gjeometrisë në jetën e përditshme, raporton Ekonomia Online.
“Në këtë panair kam marr pjesë në fushën e matematikës. Kam pasur për qëllim që matematika dhe gjeometria nukn është vetëm brenda një klase, por është edhe në rrugë dhe në qytet. Ky projekt na ka marrë kohë afër dy javë dhe kemi pasur bashkëpunim me nxënësit e klasës së nëntë. Presim rezultate, sepse nuk është hera e parë që marrim pjesë në panaire. Kemi marrë pjesë edhe në Tiranë dhe kemi pasur suksese gjithmonë”, tha Zeqiri.
Ndërsa, nxënësja Suela Sopa prezantoi projektin në fushën e fizikës me temë “Mënyrat e përfitimit të energjisë elektrike”, duke vënë theksin te mënyrat ekologjike të prodhimit të energjisë.
“Ne në këtë projekt e kemi marrë temën “Mënyrat e përfitimit të energjisë elektrike”, duke marrë parasysh qe nevojat rriten për çdo ditë dhe ndotja që shkaktohet nga prodhimi i energjisë elektrike është e madhe kemi vendosur ta marrim këtë temë, të praktikojmë mënyra të ndryshme për përfitimin e energjisë elektrike me mënyrat që nuk e ndotin ajrin e as tokën. Pra, me këtë projekt t’ i frymëzojmë dhe vetëdijesojmë gjeneratat e reja për disa forma të reja që ne mund të përfitojmë energji elektrike dhe mos ta ndotim tokën. Presim që prej këtij projekti puna jonë të vlerësohet dhe të fitojmë ndonjë çmim”, tha Sopa.
Panairi synon të nxisë kreativitetin, inovacionin dhe vetëdijesimin e brezave të rinj për zhvillime të qëndrueshme. /EO/Katror.info
Përgatiti:
