Çështja e qenve endacakë mbetet ende e pazgjidhur në shumë qytete të vendit, e njëra ndër to që përballet me këtë problematikë është Mitrovica.
Tashmë Komuna e Mitrovicës përmes një tenderi do të ndaj një buxhet në vlerë prej 400 mijë euro për trajtimin e qenve endacakë, shkruan Telegrafi.
Drejtori i Drejtorisë për Siguri dhe Emergjenca, Bahtir Maxhuni, ka thënë se projekti është akoma në proces të tenderimit.
Mundesh me e lexu edhe...
Maxhuni ka thënë se shuma e përfshirë në tender është 400 mijë euro dhe projekti është tre vjeçar.
“Shuma që është përfshirë në tender është 400 mijë euro, për tri vjet”, ka thënë Maxhuni për Telegrafin.
I pyetur se çka do të ndërmerret saktësisht për trajtimin e qenve endacakë, ai ka thënë tutje se do të bëhen të gjitha procedurat e parapara me udhëzimin administrativ të vitit 2023.
Ai ka shtuar se operatori ekonomik që përzgjedhet fitues i tenderit duhet të ketë strehimoren e vet që duhet të jetë e lincencuar nga Agjencia e Ushqimit dhe Veterinarisë së Kosovës (AVUK).
“Operatori ekonomik që përzgjedhet fitues duhet të ketë strehimoren e vet që i plotëson të gjitha standardet e parapara me UA-2023 dhe duhet të jetë i lincencuar nga AVUK”, ka shtuar Maxhuni.
Drejtori i Drejtorisë për Siguri dhe Emergjenca është shprehur se projekti do të fillon të implementohet në momentin kur përzgjedhet operatori ekonomik dhe nënshkruhet kontrata mes dy palëve.
Kjo çështje u ngrit edhe në mbledhjen e djeshme të Kuvendit Komunal të Mitrovicës nga asambleisti i VV-së, Armend Begu.
Begu kishte thënë se kjo çështje duhet të jetë prioritet dhe kërkoi që të jetë pikë e rendit të ditës për diskutim, raporton Telegrafi.
“Nuk e di pse nuk po i’u duket prioritet tema e qenve endacakë, kjo duhet të jetë prioritet i prioriteteve. Kjo duhet të jetë pikë e rendit të ditës për diskutim”, ishte shprehur Begu.
Lidhur me këtë, kryetari i Komunës së Mitrovicës, Bedri Hamza, ishte përgjigjur se shuma për trajtimin e qenve endacakë është ndarë dhe se procedurat janë në zhvillim.
“Një shumë është e ndarë për trajtimin e qenve endacakë, procedurat janë në zhvillim dhe presim që pas përfundimit të procedurave t’a kemi kontratën e re për këtë çështje”, kishte thënë Hamza.
Ai e cilësoi këtë temë si një urgjencë dhe domosdosshmëri, derisa potencoi se nëse ky problem nuk trajtohet njësoj në të gjitha komunat tjera, gjendja nuk do të përmirësohet në tërësi.
“Ky problem nuk do të mund të zgjidhet në mënyrën e duhur nëse nuk intervenohet në të gjithë Kosovën në të njëjtën kohë. Për shkak se ti e bën një zgjidhje për një periudhë të caktuar kohore, nëse në komunat fqinje nuk ndodh trajtimi i problemit njëjtë, atëherë prapë se prapë gjendja nuk do të përmirësohet krejtësisht”, kishte theksuar kryetari i Komunës së Mitrovicës.
Në ndërkohë, para shtatë muajsh Maxhuni kishte treguar se Komuna e Mitrovicës pritet të hap një projekt-tender për trajtimin e kësaj çështjeje.
“Ne si komunë do të hapim projekt-tender, ku përmes operatorëve ekonomikë do të trajtojmë problemin e qenve endacakë”, kishte vijuar ai.
Në anën tjetër, qytetarët vazhdojnë t’i shprehin ankesat e tyre dhe të njëjtit shprehën se prania e qenve endacakë paraqet rrezik për të gjithë, e veçanërisht për fëmijët. /Katror.info
Përgatiti:
