Pas një takimi me përfaqësuesit e Sindikatës së Ndërmarrjes Publike “Pastrimi”, drejtori i Shërbimeve Publike në Komunën e Prishtinës, Bekim Brestovci, bëri të ditur se është arritur një marrëveshje për nënshkrimin e një kontrate në vlerë prej 1.5 milionë euro për punë shtesë.
Sipas Brestovcit, kjo marrëveshje do të mundësojë që “Pastrimi”, nëse arrin të rikthejë kapacitetet operative, të marrë përsipër menaxhimin e një të tretës së territorit të Prishtinës, përkrah dy operatorëve ekonomikë privatë që aktualisht janë në terren.
“Jemi dakorduar që nga sot, me një person të autorizuar nga ndërmarrja ‘Pastrimi’, ta nënshkruajmë kontratën prej 1.5 milionë euro për punën shtesë”, deklaroi Brestovci. Ai shtoi se kjo është një përpjekje për të përfshirë ndërmarrjen publike në zgjidhjen e krizës së pastrimit që ka përfshirë kryeqytetin.
Mundesh me e lexu edhe…
Brestovci tha gjithashtu se Komuna e Prishtinës është e gatshme të thërrasë një seancë të jashtëzakonshme për të diskutuar dhe miratuar një vendim për subvencionimin e pagave për punëtorët e “Pastrimit”.
“Nga ana jonë nuk ka asnjë hezitim. Ne shprehëm gatishmërinë që të thërrasim një seancë të jashtëzakonshme për ta sjellë sërish vendimin për subvencionimin e pagave për punëtorët. Natyrisht, duhet të punojmë bashkërisht”, tha Brestovci.
Kjo marrëveshje vjen pas disa ditësh tensioni dhe akuzash publike nga ndërmarrja “Pastrimi”, e cila kishte shprehur shqetësime për borxhet nga Komuna dhe përfshirjen e operatorëve privatë në ofrimin e shërbimeve të pastrimit./Albanian Post/Katror.info
