Samir Shahini, drejtor i Arsimit në Komunën e Prishtinës ka njoftuar se ka nënshkruar inicimin e procedurës për tenderimin e ndërtimit të Liceut Artistik të Prishtinës, më 18.04.2025.
Sipas Shahinit, ndërtimi i këtij super-kompleksi do ta vendosë edukimin artistik në një nivel krejt tjetër, ndërsa ka bërë të ditur se në kuadër të kësaj, shkolla e muzikës “Prenk Jakova” do të jetë e para që do të ndërtohet.
“Nuk mund të fsheh emocionin që më sjell ky hap i madh për nxënësit dhe mësimdhënësit që e kanë pritur gjatë këtë moment! Liceu do të përfshijë gjithçka: muzikë, arte pamore e dramë – në një hapësirë moderne, funksionale dhe të menduar me kujdes për nevojat e çdo artisti të ri. Kjo nuk është vetëm një shkollë – është një ëndërr që po merr formë e një premtim që po realizohet!” – ka shkruar Shahini në Facebook, më 18.04.2025.
Mundesh me e lexu edhe…
Shahini ka ndarë edhe fotografi të planit të Liceut Artistik të kryeqytetit.
Në anën tjetër, nxënës të Shkollës së Muzikës ‘Prenk Jakova’ në kryeqytet kishin ndërhyrë me disa pankarta gjatë konferencës së Komunës më 07.06.2024 për punët që po i kryen “Arkitekti i Kryeqytetit”, duke kërkuar të dinin se kur do t’u sigurohet një objekt shkollor.
Me shkrime “Duam objekt”, “Edhe sa me prit”, “75 vjet pa objekt”, nxënësit i kërkuan përgjigje kryetarit të Prishtinës, Përparim Rama.
I pari i kryeqytetit ishte shprehur se projekti është gati, por ende janë në negociata për pronën.
E kemi bërë hapësirën tash ku është ‘Burger King’ afër ish- Rilindjes. Kemi bërë projektin për këtë shkollë, por e kemi një pjesë aty që Agjencia e Privatizimit i ka disa objekte. Jemi në negociata që t’i blejmë e t’i shpronësojmë për ndërtim të shkollës” – kishte thënë Rama.
“E kemi një rini të mrekullueshme” – kishte shtuar Rama.
Nxënësit e Shkollës “Prenk Jakova” aktualisht ndjekin mësimin në një aneks të Shkollës së Mesme të Mjekësisë “Ali Sokoli”./Katror.info
Përgatiti:
