Këshilli i Përgjithshëm i Lëvizjes Vetëvendosje ka vendosur që nënkryetari i partisë, Glauk Konjufca, të jetë mandatar për kryeministër.
Vendimi është marrë një ditë para skadimit të afatit 10-ditor të përcaktuar nga presidentja e Kosovës, Vjosa Osmani, për t’ia dhënë mandatin një kandidati për formimin e qeverisë së re.
Ky hap vjen pas konsultimeve të brendshme në Vetëvendosje, pas zgjedhjeve të mbajtura dhe zhvillimeve politike që kanë vijuar në vend.
Mundesh me e lexu edhe…
Kurti në propozim ka thënë se vetë do të jetë kandidat për ministër të Punëve të Jashtme, për çka ishte propozuar herën e shkuar Konjufca. “Këtë propozim e bëj për shkak të besimit të madh që kam për Konjufcën, por edhe për shkak që të mos bëhen zgjedhje tjera. Unë marr vendin e Glaukut e Glauku timin”, ka thënë ai.
Të mërkurën, më 5 nëntor, përfundon afati 10-ditor brenda të cilit presidentja Vjosa Osmani duhet të mandatojë një kandidat tjetër për kryeministër apo të shpallë zgjedhjet e parakohshme.
Kryetari i Lëvizjes Vetëvendosje, Albin Kurti, që në përpjekjen e parë dështoi të marrë votat e nevojshme për t`u bërë kryeministër, presidentes Osmani i kërkoi disa ditë kohë para se t`i kthejë përgjigje, nëse do të tentojë sërish të formojë qeverinë apo do t`u bashkëngjitet partive të tjera që janë përcaktuar për të shkuar në zgjedhje të parakohshme./Katror.info
