Biblioteka Kombëtare e Kosovës “Pjetër Bogdani” ka filluar zyrtarisht një bashkëpunim të rëndësishëm me Bibliotekën e Kongresit në SHBA, përmes një programi të këmbimit të materialeve bibliotekare.
Ky projekt shkon përtej shkëmbimit të thjeshtë të librave – ai nënkupton afirmim ndërkombëtar për autorët dhe studiuesit nga Kosova, duke hapur dyer të reja për bashkëpunim akademik dhe qarkullim kulturor në nivel global, raporton Katror.info.
Në kuadër të këtij bashkëpunimi të ri dhe me rëndësi të veçantë, Biblioteka Kombëtare e Kosovës ka pranuar titujt e parë nga Biblioteka e Kongresit disa ditë më parë, duke shënuar një moment historik në rrugëtimin e saj.
Mundesh me e lexu edhe…
“Aktualisht, Biblioteka është duke përzgjedhur dhe përgatitur dërgesën e saj të parë me botime nga Kosova, të cilat do të bëhen pjesë e fondit të Bibliotekës së Kongresit në Shtetet e Bashkuara. Këta tituj përfaqësojnë me dinjitet pasurinë tonë letrare, shkencore dhe kulturore,” njofton BKK.
Përfshirja e botimeve kosovare në një bibliotekë me reputacion ndërkombëtar jo vetëm që dëshmon vlerën e tyre intelektuale dhe kulturore, por gjithashtu forcon lidhjet ndërkulturore mes Kosovës dhe Shteteve të Bashkuara./Katror.info
