Qendra Kinematografike e Kosovës ka bërë të ditur rikthimin e saj në një nga ngjarjet më të rëndësishme të industrisë filmike, Marché du Film në kuadër të Festivalit të 77-të të Filmit në Kanë, shkruan Katror.info.
Në një njoftim të shpërndarë në rrjetet sociale, QKK-ja konfirmon se Kosova dhe Shqipëria janë bashkuar edhe këtë vit në Pavilonin 137 në fshatin ndërkombëtar Riviera, nën përkujdesjen e Qendrës Kinematografike të Kosovës dhe Qendrës Kombëtare të Kinematografisë së Shqipërisë.
“Kosova dhe Shqipëria në Marché du Film. Rikthehemi në Kanë!” – thuhet në njoftimin, duke ftuar pjesëmarrësit të vizitojnë pavijonin dhe të takojnë krijuesit nga të dy vendet.
Përfaqësues nga të gjitha fushat e industrisë filmike – regjisorë, producentë, skenaristë e profesionistë të tjerë – po përfaqësojnë kinematografinë kosovare dhe shqiptare në këtë platformë ndërkombëtare. QKK thekson rëndësinë e pjesëmarrjes në Marché du Film si një hapësirë për rrjetëzim, bashkëpunim dhe promovim të filmit shqiptar në arenën globale.
“Ejani na përshëndetni, pini një kafe dhe njihuni me njerëzit që qëndrojnë pas këtyre tregimeve!” – përfundon njoftimi, duke e kthyer pavijonin në një pikëtakimi të rëndësishëm për krijuesit dhe dashamirësit e filmit.
Qendra Kinematografike e Kosovës këtë vit përfaqësohet në programin prestigjioz “Focus COPRO” 2025 me projektin “LOST FRAMES”, debutimi i parë në metrazh të gjatë i regjisorit Samir Karahoda.
Pas suksesit me filmat e tij të shkurtër në Kanë, Karahoda nis një kapitull të ri krijues me një projekt të mbështetur nga QKK si projekt në zhvillim.
Focus COPRO’, pjesë e programeve kreative të Festivalit të Kanës që nga viti 2018, synon të mbështesë regjisorë të rinj me potencial të lartë, duke i lidhur ata me vendimmarrës kyç të industrisë globale të filmit.
LOST FRAMES është përzgjedhur si një nga 7 projektet ndërkombëtare që do të prezantohen këtë vit, një mundësi e rëndësishme për zhvillimin dhe rrugëtimin ndërkombëtar të filmit./Katror.info
