Në ambientet e Shtabit të Përgjithshëm të Forcave të Armatosura të Republikës së Shqipërisë është zhvilluar takimi ndërmjet përfaqësuesve të Shtabit të Përgjithshëm të FARSH dhe atyre të Forcës së Sigurisë së Kosovës (FSK), me qëllim hartimin e planit të bashkëpunimit dypalësh për periudhën 2025–2028.
Shefi i Shtabit të Përgjithshëm të FA-ve, gjenerallejtënant Arben Kingji, e ka vlerësuar lartë përparimin e FSK-së në procesin e transformimit dhe modernizimit, duke theksuar performancën profesionale të saj në stërvitjet dy dhe shumëpalëshe, si dhe rolin strategjik të FSK-së në garantimin e sigurisë në Kosovë dhe rajon.
“Sigurova delegacionin e FSK-së, të kryesuar nga kolonel Haki Hoti, për vullnetin e palëkundur të FA për të përmbushur të gjitha nevojat e FSK në fushat e arsimimit, stërvitjes, shkëmbimit të përvojës dhe bashkëpunimit ushtarak”, ka theksuar ai.
Mundesh me e lexu edhe…
Kurse, Ministria e Mbrojtjes bëri të ditur se, ky nuk është thjesht një bashkëpunim teknik, është një marrëdhënie vëllazërore që forcohet çdo ditë, me besim, respekt dhe vizion të përbashkët për sigurinë e vendeve tona dhe të gjithë rajonit.
“FSK ka bërë hapa të mëdhenj përpara në transformimin dhe modernizimin e saj dhe Shqipëria do të vijojë ta mbështesë me të gjitha mundësitë, në çdo fushë ku ka nevojë: nga arsimimi dhe stërvitja, te shkëmbimi i eksperiencave dhe ndërtimi i kapaciteteve”, thekson MM.
MM shprehu vendosmërinë për ta çuar edhe më tej këtë bashkëpunim.
Ky takim shënon një tjetër hap konkret në forcimin e marrëdhënieve strategjike ndërmjet Shqipërisë dhe Kosovës në fushën e mbrojtjes dhe sigurisë, duke synuar ngritjen e kapaciteteve të përbashkëta dhe ndërveprueshmërinë në nivel rajonal e ndërkombëtar./RTK/
