Kosova do të nënshkruajë Marrëveshjen e Tregtisë së Lirë me vendet anëtare të EFTA-s (Shoqatës Evropiane të Tregtisë së Lirë) gjatë Forumit Ekonomik Botëror në Davos.
Sipas Zyrës së Kryeministrit, kjo marrëveshje përfshin tregtinë e mallrave dhe shërbimeve dhe krijon mundësi të reja për prodhuesit dhe kompanitë vendore.
“Kosova është i vetmi vend në rajon që, përveç negocimit për tregti të mallrave, ka negociuar edhe për tregti të shërbimeve me EFTA-n. Kjo marrëveshje do të forcojë partneritetin ekonomik dhe tregtar ndërmjet vendit tonë dhe Norvegjisë, Zvicrës, Lihtenshtajnit dhe Islandës si shtete anëtare të EFTA-s,” thuhet në njoftimin zyrtar.
Mundesh me e lexu edhe…
Kryeministri Albin Kurti ka udhëtuar sot për në Zvicër për të marrë pjesë në Forumin Ekonomik Botëror. Gjatë qëndrimit në Davos, Kurti do të marrë pjesë në panelet: “Demokracitë e qëndrueshme në një epokë të ndryshimit” dhe “Inteligjenca Artificiale për Njerëzimin: inovacioni etik në epokën e Inteligjencës”.
”Dita e parë e qëndrimit në Zvicër u përmbyll me darkën e hapjes së Forumit Ekonomik Botëror, e nesër vijojmë mes tjerash edhe me nënshkrimin e Marrëveshjes së Tregtisë së Lirë me vendet anëtare të EFTA-s”, ka shkruar Kryeministri i Kosovës, Albin Kurti.
Të dy këto panele do të mbahen në Shtëpinë e Kosovës (House of Kosova), e cila është hapur për herë të parë në Davos.
Në Forumin Ekonomik Botëror marrin pjesë edhe ministrja e Industrisë, Ndërmarrësisë dhe Tregtisë, Rozeta Hajdari, dhe ministrja e Ekonomisë, Artane Rizvanolli.
Përveç takimeve me përfaqësues shtetërorë dhe investitorë, pjesëmarrja e Kosovës në këtë forum synon të promovojë mundësitë ekonomike dhe investimet strategjike në vend. /Katror.info
Përgatiti:
