Ekipi përfaqësues i Kosovës në lojën elektronike Counter-Strike 2 ka siguruar kualifikimin në çerekfinale të Kampionatit Evropian Esports 2025, që po mbahet në sallën “1 Tetori” në Prishtinë, shkruan Katror.info.
Pas dy fitoreve mbresëlënëse në fazën e grupeve – fillimisht ndaj Çekisë me rezultat 2:0 dhe më pas ndaj Danimarkës me përmbysje 2:1 – Kosova u rendit në vendin e parë të grupit dhe siguroi kalimin ndër tetë skuadrat më të mira të Evropës.
Në fazën çerekfinale, Kosova do të përballet me Lituaninë, e cila përfundoi e dyta në grupin D. Ndeshja pritet të zhvillohet të premten, nga ora 14:30.
Mundesh me e lexu edhe…
Po atë ditë, në orën 21:30, janë paraparë të luhen edhe gjysmëfinalet, ndërsa finalja e madhe do të zhvillohet të dielën në mbrëmje, duke kurorëzuar kampionin e ri evropian në këtë disiplinë gjithnjë në rritje.
Kjo paraqitje e Kosovës konfirmon përparimin e saj të qëndrueshëm në skenën ndërkombëtare të esports, me shpresë për një tjetër sukses në përballjet vendimtare që e presin./Katror.info
