Kosova është renditur në vendin e tretë në botë për siguri në raportin e Gallup 2025, me një rezultat prej 94 pikësh në Indeksin e Ligjit dhe Rendit. Raporti mat perceptimin e qytetarëve për sigurinë në komunitet, besimin ndaj institucioneve të rendit si dhe përvojat me krime të tilla si vjedhjet apo sulmet, shkruan Katror.info.
Në krye të listës janë Taxhikistani me 97 pikë dhe Singapori me 95, ndërsa menjëherë pas tyre renditet Kosova. Ky rezultat e vendos vendin përpara shteteve si Norvegjia, Austria dhe Zvicra, si dhe disa shteteve të Gjirit, përfshirë Bahreinin, Omanin dhe Arabinë Saudite.
Sipas Gallup, 73% e të rriturve në botë ndihen të sigurt kur ecin vetëm natën, përqindja më e lartë që nga viti 2006. Raporti thekson se, përveç uljes së rasteve të dhunës, siguria lidhet edhe me nivelin e besimit të qytetarëve tek institucionet publike.
Mundesh me e lexu edhe…
Raporti i Gallup mbulon 144 vende dhe territore dhe përfshin përgjigjet e mbi 1000 të rriturve në secilin vend, të përzgjedhur për të përfaqësuar popullsinë mbi moshën 15 vjeç. Anketimet kryhen si me telefon ashtu edhe ballë për ballë, në varësi të kushteve lokale, ndërsa niveli i gabimit statistikor llogaritet zakonisht nga ±3 deri në ±5 pikë përqindje. Kjo e bën Indeksin e Ligjit dhe Rendit një nga matjet më të gjera ndërkombëtare të perceptimit të sigurisë.
Renditja e lartë e Kosovës shihet si tregues i rritjes së stabilitetit dhe i përmirësimit të perceptimit të qytetarëve për rendin dhe sigurinë, në një kohë kur globalisht shënohen nivele të larta konfliktesh të armatosura./Katror.info
Përgatiti:
