Kosova ka ndërmarrë një hap të rëndësishëm drejt garantimit të një mjedisi më të pastër dhe një sektori të ujit më të qëndrueshëm, me mbajtjen e takimit të parë të gjerë konsultativ për hartimin e Strategjisë Kombëtare për Menaxhimin e Llumit të Kanalizimeve. Dialogu, i zhvilluar të premten, shërbeu si pikënisje e një procesi gjithëpërfshirës që synon të krijojë politika moderne dhe të qëndrueshme në këtë fushë jetike.
Në diskutime morën pjesë përfaqësues nga institucionet qendrore, komuniteti akademik, shoqëria civile, kompanitë rajonale të ujësjellës-kanalizimeve, partnerë zhvillimorë, donatorë si dhe Programi për Menaxhimin e Integruar të Resurseve Ujore në Kosovë (IWRM-K). Sipas organizatorëve, pjesëmarrja e gjerë dëshmoi se qasja ndërsektoriale dhe dialogu i hapur janë çelësi për zgjidhje afatgjata dhe të qëndrueshme.
Në panele u përfshinë përfaqësues nga Zyra e Kryeministrit – Departamenti për Planifikim Strategjik, Ministria e Mjedisit, Planifikimit Hapësinor dhe Infrastrukturës, Agjencia për Mbrojtjen e Mjedisit, kompanitë rajonale të ujit, organizatat e shoqërisë civile si EcoZ, si dhe Programi IWRM-K.
Mundesh me e lexu edhe...
Palët e interesit vlerësuan lart punën paraprake të grupit punues, i cili deri më tani ka përgatitur analizën krahasuese, letrën e pozicionit dhe propozimin e planit të veprimit — dokumente që përbëjnë një bazë të fuqishme teknike dhe politike për vendimmarrje të mëtejshme.
Komentet pozitive dhe gatishmëria për bashkëpunim kanë rritur pritjet se kjo nismë do të përkthehet në politika konkrete, duke i dhënë Kosovës një qasje të qëndrueshme për menaxhimin e llumit të kanalizimeve.
SHUKOS theksoi se mbetet e përkushtuar të mbështesë proceset që ndikojnë drejtpërdrejt në shëndetin publik, mbrojtjen e mjedisit dhe ngritjen e cilësisë së shërbimeve të ujit në vend./Katror.info
