Ministria e Arsimit, Shkencës, Teknologjisë dhe Inovacionit (MAShTI) ka njoftuar se janë publikuar rezultatet e para të Hulumtimit Ndërkombëtar për Mësimdhënie dhe Mësimnxënie – TALIS 2024, të organizuar nga Organizata për Bashkëpunim dhe Zhvillim Ekonomik (OECD), shkruan Katror.info.
Ky është viti i parë që Kosova merr pjesë në këtë studim ndërkombëtar, i cili përfshiu 55 sisteme arsimore nga e gjithë bota dhe ka për qëllim mbledhjen e të dhënave mbi mësimdhënien, mësimnxënien dhe kushtet e punës së mësimdhënësve dhe drejtorëve të shkollave.
Në Kosovë, në këtë cikël morën pjesë 3,281 mësimdhënës dhe 222 drejtorë nga shkollat e mesme të ulëta, ndërsa anketa u zhvillua gjatë periudhës 15 mars – 22 prill 2024, përmes platformës online.
Mundesh me e lexu edhe...
Sipas MAShTI-t, TALIS është hulumtimi më i madh ndërkombëtar që fokusohet në përvojat dhe perceptimet e mësimdhënësve dhe drejtorëve të shkollave, duke ofruar të dhëna të krahasueshme për mjediset e mësimdhënies dhe zhvillimin profesional në arsim.
Rezultatet e para për Kosovën tregojnë se mosha mesatare e mësimdhënësve është 44 vjeç, pothuajse e njëjtë me mesataren e OECD-së (45), ndërsa 60% e tyre janë femra dhe 9% nën moshën 30 vjeçare.
Po ashtu, 97% e mësimdhënësve kanë marrë pjesë në ndonjë formë të trajnimit profesional gjatë 12 muajve të fundit – një përqindje më e lartë se mesatarja e OECD-së (91%). Megjithatë, vetëm 28% e tyre kanë ndjekur trajnime që përfshijnë përdorimin e teknologjisë digjitale në mësimdhënie.
Rezultatet gjithashtu tregojnë se 97% e mësimdhënësve në Kosovë u mësojnë nxënësve si të përdorin informacionin e fituar dhe 90% i ndihmojnë në zgjidhjen e problemeve reale – përqindje më të larta se mesatarja e OECD-së.
Një tjetër aspekt pozitiv është bashkëpunimi ndërmjet kolegëve, ku 82% e mësimdhënësve shkëmbejnë rregullisht materiale mësimore dhe 64% diskutojnë për performancën e nxënësve.
Në nivel drejtuesish, 96% e drejtorëve marrin pjesë aktive në menaxhimin e mësimdhënies – shumë më tepër se mesatarja e OECD-së (76%) – megjithëse vetëm 48% janë të përfshirë në planifikimin strategjik afatgjatë.
Në përgjithësi, 85% e mësimdhënësve në Kosovë deklarojnë se ndihen të përmbushur në punën e tyre, ndërsa 77% besojnë se profesioni i mësimdhënësit vlerësohet nga shoqëria – mbi mesataren e OECD-së (67%).
Sipas MAShTI-t, këto gjetje ofrojnë një pasqyrë të vlefshme për përmirësimin e politikave arsimore, sidomos në fushat e zhvillimit profesional, përfshirjes digjitale, forcimit të rolit të drejtuesve të shkollave dhe ngritjes së statusit të profesionit të mësimdhënësit në shoqëri.
Ministria ka bërë të ditur se do t’i përdorë këto rezultate për hartimin e programeve të reja të trajnimit dhe për avancimin e standardeve të cilësisë në sistemin arsimor të Kosovës./Katror.info
