Ministria e Shëndetësisë dhe Shoqata “Grupi Mbështetës për Fibrozë Cistike në Kosovë” kanë nënshkruar një Memorandum Bashkëpunimi për organizimin e Konferencës së 12-të për Fibrozën Cistike në Evropën Juglindore, e cila do të mbahet nga 3 deri më 5 prill 2025, shkruan Katror.info.
Memorandumi u firmos nga Ministri i Shëndetësisë, Arben Vitia, dhe përfaqësuesi i Shoqatës, Atdhe Rama, duke konfirmuar angazhimin e institucioneve për të rritur ndërgjegjësimin dhe për të përmirësuar trajtimin e kësaj sëmundjeje të rrallë. Në kuadër të këtij bashkëpunimi, Ministria e Shëndetësisë do të mbështesë organizimin e konferencës me një fond prej 30,000 eurosh.
Fibroza cistike është një sëmundje gjenetike e cila prek mushkëritë dhe sistemin tretës, duke shkaktuar probleme serioze me frymëmarrjen dhe tretjen. Organizimi i kësaj konference synon të rrisë cilësinë dhe sigurinë e shërbimeve për pacientët në Kosovë dhe rajon, duke sjellë së bashku ekspertë shëndetësorë dhe përfaqësues të komunitetit mjekësor nga Europa Juglindore.
Mundesh me e lexu edhe…
Ky aktivitet ndërkombëtar do të shërbejë si një platformë për shkëmbimin e përvojave dhe praktikave më të mira në trajtimin e kësaj sëmundjeje, duke përforcuar përpjekjet për përmirësimin e kujdesit shëndetësor për pacientët me fibrozë cistike në Kosovë./Katror.info
Përgatiti:
