Ministri në detyrë i Mjedisit, Planifikimit Hapësinor dhe Infrastrukturës, z. Liburn Aliu, ka marrë pjesë në konferencën ndërkombëtare “Digital Mobility and ITS Conference for Western Balkans” që po mbahet në Sevilje të Spanjës, ku prezantoi të arriturat e Kosovës në fushën e mobilitetit digjital dhe sistemeve inteligjente të trafikut (ITS), shkruan Katror.info.
Në fjalën e tij, ministri Aliu theksoi avancimin e konsiderueshëm të Kosovës gjatë mandatit të tij në këtë fushë, duke përmendur disa nga arritjet kyçe si miratimi i Strategjisë për Sistemet Inteligjente të Trafikut (ITS), Plani i Veprimit për zbatimin e saj, si dhe adoptimin e Ligjit për Rrugët bashkë me aktet nënligjore përkatëse.
“Paralelisht me këto zhvillime ligjore dhe strategjike, kemi filluar edhe operacionalizimin e strategjisë dhe punimet për dizajnimin e Qendrës për Menaxhimin e Trafikut (TMC), e cila do të shërbejë si një njësi kombëtare për monitorimin e trafikut, analizimin e të dhënave, menaxhimin e incidenteve dhe ofrimin e shërbimeve të informacionit në kohë reale”, deklaroi ministri Aliu.
Mundesh me e lexu edhe…
Ai shtoi se përkushtimi i institucioneve të Kosovës mbetet i palëkundur për përmirësimin e sigurisë dhe efikasitetit të transportit, si një element kyç që ndikon drejtpërdrejt në zhvillimin ekonomik të vendit, përmirësimin e mirëqenies sociale dhe mbrojtjen e mjedisit.
Pjesëmarrja e Kosovës në këtë konferencë rajonale rikonfirmon angazhimin e vendit për të ndjekur standardet evropiane në sektorin e transportit dhe teknologjisë, duke e vendosur vendin në rrugën drejt një infrastrukture moderne, të sigurt dhe të qëndrueshme./Katror.info
